Ko Te Huafa ʼo Te ʼAtua
“Kapau ʼe mole ko Sehova ʼaē ʼe ina laga te fale, pea ʼe mole he ʼuhiga ʼo te gāue kinakina ʼo tona ʼu tufuga.” Koʼena te fakaliliu ʼo te palalau faka latina ʼaē ʼe tohi ʼi te fuga matapā. Ko te ʼu palalau ʼe fakatafito ki te Pesalemo 127:1 ʼi te Tohi-Tapu, pea ʼe moʼoni te talanoa ʼaia: Ko te ʼu faiga ʼaē ʼe mole ʼi ai te tapuakina ʼa Sehova, ʼe liliu ia ʼo noa.
Ko te talanoa talu mai te taʼu 1780 ʼo totatou temi, neʼe tohi ʼi te fale ʼi Colombo, ʼi Srī Lankā, pea ʼe maʼuhiga, heʼe tohi ai te huafa ʼo te ʼAtua, ko Sehova (Vakaʼi te paki). Ko te higoa ʼaia ʼi te ʼu ʼuluaki sēkulō neʼe lahi tona fakaʼaogaʼi. Neʼe tau tohi ʼi te ʼu fale, ʼi te ʼu ʼēkelesia, ʼo toe feiā aipe mo te ʼu foʼi piesi. Neʼe fakaʼaogaʼi e te kau misionea te huafa ʼo te ʼAtua ʼi tanatou fakahā te Tohi-Tapu ki te ʼu fenua mamaʼo, ʼaē ʼe mahino papau ia ʼe talanoa ki te mataʼi tohi ʼaia ʼi Srī Lankā.
ʼE kehekehe ʼosi mo te ʼu meʼa ʼaē ia ʼaho nei! Tokosiʼi ia nātou ʼaē ʼe nātou ʼui ko nātou ko te kau kilisitiano ʼe nātou tokakaga ki te huafa ʼo te ʼAtua. Ko ʼihi hahaʼi popoto ʼo te Tohi-Tapu neʼe nātou fatufatuʼi te kau Fakamoʼoni ʼa Sehova ʼi tanatou faka maʼuhigaʼi te huafa ʼaia. Koteā tona tupuʼaga? ʼI te manatu ʼa ʼihi, ko tona puʼaki faka hepeleo ʼe mole ʼiloʼi lelei ia. Kae ko te toko fia ʼe nātou ʼiloʼi te puʼaki totonu faka hepeleo ʼo te huafa ʼo Sesu? Kae, ko tona higoa ʼe fakaʼaogaʼi pea mo fakaʼapaʼapaʼi ʼi te potu fuli.
Kia Sesu, ko te huafa ʼo te ʼAtua neʼe maʼuhiga ʼaupito. Neʼe ina akoʼi ke tou faikole, ʼo fēnei: “Ke tāpuhā tou huafa!” (Mateo 6:9). Pea ʼi muʼa ʼo tona mate, neʼe ina ʼui ki te ʼAtua, ʼo fēnei: “Neʼe ʼau fakaʼilo tou huafa ki te hahaʼi ʼaē neʼe ke foaki mai kia te ʼau ʼi te lotolotoiga ʼo te malamanei.” (Soane 17:6). Ko te kau kilisitiano moʼoni ko te kau tisipulo ʼe nātou mulimuli ʼi te ʼu ala ʼa Sesu. ʼE mole tonu koa la ‘ke nātou fakaʼilo mo nātou te huafa ʼo te ʼAtua’? Koia ʼe fai ai e te kau Fakamoʼoni ʼa Sehova, pea ʼe tapuakiʼi ʼaupito e Sehova tonatou “fale”. Kia nātou ʼaia ko te pesalemo ʼe moʼoni: “Manuʼia te hahaʼi ʼaē ko tonatou ʼAtua ko Sehova!” — Pesalemo 144:15.