ʼE Feala Koa Ke Fua Manuʼia Kia Koutou?

KO TE nusipepa ʼaē ʼe koutou puke ʼi ʼokotou ʼu nima ʼe fakatuʼutuʼu ko he matapuna ʼo he fakaloto mālohi, ʼo ina fakahā ki te ʼatamai, te takitaki ʼa te Tohi-Tapu moʼo fakatokatoka ʼo te ʼu famili pea mo taupau maʼu he agatonu takitokotahi. ʼE fakahā ʼaki ai ko te ʼu temi faigataʼa ʼaenī neʼe kua ʼosi fakakikite kiai ʼi te Tohi-Tapu, pea ʼe fakaʼiloga aipe ko te fakatokatoka ʼo te ʼu meʼa ʼaia—ʼe ko te Puleʼaga pe ʼo te ʼAtua. ʼE feala koa ke koutou maʼu he fua lelei mai Te Tule Leʼo pea mo te nusipepa Réveillez-vous!?

Mai Filipine, ko te fafine ʼe higoa ko Vilma neʼe ina tohi, ʼo fēnei: “Kapau ʼe ʼi ai he faʼahiga kupu moʼo fakamatalatala ʼo takotou ʼu tohi faka Tohi-Tapu, ʼi taku manatu ʼe ʼau fakaʼaoga anai te kupu ʼaē ko te ‘taulekaleka.’ Neʼe ʼau sio pea mo ʼau ʼuluaki lau takotou ʼu nusipepa ʼaē ko te Réveillez-vous! pea mo Te Tule Leʼo ʼi te kā, ko taku haʼu ʼaia mai toku ʼapi mai Manille. ʼE ʼau toʼo māhani te ʼu sulunale mokā ʼe ʼau fagona, kae ʼi taku ʼalu ʼaia neʼe mole ʼau toʼo pe la he sulunale.

“Neʼe ʼau heka fakatahi mo te tagata kua fotutuʼa tagata pea neʼe ʼi ai tana ʼu tohi ʼi takotou ʼu tohi faka Tohi-Tapu. ʼI tana ʼosi lau ʼo te nusipepa Réveillez-vous!, neʼe ina lau te tahi age nusipepa, ko Te Tule Leʼo. Neʼe ʼau toʼo ia ia te nusipepa ʼaē ko te Réveillez-vous! ʼE ʼau fakahā fakahagatonu, neʼe ʼau leleiʼia taku lau ia te ʼu nusipepa ʼaia koteʼuhi ko te ʼu alatike fuli neʼe ʼaoga, ʼe tau mo te ʼu meʼa ʼaē ʼe hoko, pea ʼe maʼuhiga.”

Neʼe fakaʼosi te palalau ʼa te fafine, ʼo fēnei: “ ʼE ʼau fia maʼu takotou ʼu nusipepa. Fakalelei tokotou loto, koutou fakahā mai kia ʼau peʼe feafeaʼi haku maʼu te ʼu nusipepa ʼaia.” Ko te filiale ʼo te kau Fakamoʼoni ʼa Sehova ʼi Filipine neʼe fiafia ʼi te tohi ʼa te fafine ʼaē neʼe maʼu ʼi tanatou meli.