“ ʼE Laka Age Ia ʼi He Kolo Mālohi”

“ ʼO MULIMULI pe ki te ʼu tānaki ʼo te temi nei, ko tamaliki e 40 ʼi te toko teau ʼe nātou sio mata anai ki te mavete ʼo tanatou ʼu mātuʼa ʼi muʼa ʼo tonatou taʼu 18.” (Science, ʼaho 7 ʼo Sūnio 1991) ʼE ko he fakaʼau fakamataku! He koʼe koa neʼe hoko te meʼa ʼaia?

Neʼe fakahā e te tuʼi fakamāu ko Edward M. Ginsburg tana manatu ʼo ʼuhiga mo te ʼu meʼa faka famili pea mo te ʼu meʼa faka telepinale ʼi tona fakafehuʼi ʼaē e te nusipepa (The Boston Globe). Neʼe ina ʼui fēnei: “ ʼE tou maʼuʼuli nei ʼi te mālama e tahi manatu ai te tagata kia ia pe. ʼE tou tahi fakamuʼamuʼa pe ia ‘kita totonu.’ ʼE tou fehuʼi fēnei, ‘Koteā te meʼa ʼe feala ke ʼau maʼu ai?’ ʼE tou loto ke tou foimo maʼu fakavilivili atu aipe.”

Ko te taʼi manatu pe ʼaia kia kita totonu faka tamaliki, ʼe ina taki ki te lotomamahi pea mo te ʼu fihifihia ʼi te nofo ʼohoana. ʼE ʼui e te Tuʼi Fakamāu ko Ginsburg, ka ʼolo he taumatuʼa ki te telepinale, ko te tagata pea mo te fafine ʼe nā tahi faiga pe ko ai ʼaē ʼe tonu. ʼE tahi loto ke ʼui age ʼe tonu kae ʼe hāla tona hoa. ʼE tahi loto ke ʼui age e he tahi fēnei: “Kua ke mālo.”

Ko tana ʼu palalau ʼe nātou fakamanatuʼi mai kia tatou te tāʼaga lea ʼaenī mai te ʼAtua: “Ko he tēhina neʼe fai he lākahala kiai ʼe laka age ia ʼi he kolo mālohi.” (Tāʼaga Lea 18:19) Ei, kapau ʼe malaga he fihi ʼi he taumatuʼa, ko te taumatuʼa ʼaē ʼe ʼiʼita ʼe feala ke puli ia nāua te aga fakapotopoto pea mo te tahi loto pe ʼaē ke tahi tuʼu tona tonu. Ko te meʼa ʼe tau hoko, ʼe mole fia tō ki lalo he tahi, ohage pe ko he “kolo mālohi” ʼe tauʼi e tona ʼu fili.

ʼE tonu koa ke haʼele feiā ia meʼa fuli? Kailoa ia, ʼe ʼi ai te puleʼaki ke fai. Ko te ʼu ʼohoana ʼe mālolohi pea mo tologa mokā ʼe muliʼi ʼi te kamata pe ʼo te nonofo ʼohoana ia te tokoni ʼaenī ʼa te ʼapositolo ko Paulo: “Koutou maʼu te agalelei ia koutou, fonu ʼi te manavaʼofa, ʼo koutou tahi fefakamolemoleʼaki ia koutou ohage ko te fakamolemole ʼaē ʼa te ʼAtua kia koutou ʼaki ia Kilisito.” (Efesi 4:32) ʼE faigafua koa ia te maʼu ʼo te ʼu taʼi kalitate ʼaia? ʼE mole faigafua tuʼumaʼu. Kae ʼe faigafua age koa te mavete ia? Koteā te ʼui ki te lotomamahi pea mo te ʼu faigataʼaʼia ʼi te faʼahi ʼo te falā ʼaē ʼe tupu mai he maʼuli faka taumatuʼa ʼe haʼele kovi? Kae e feafeaʼi te fānau, ʼaē ʼe tautau ʼiloga ai te mavete ʼo tanatou ʼu mātuʼa ʼi tonatou maʼuli mokā nātou lalahi?

ʼE lelei age ki te taumatuʼa ke nā gāue fakatahi moʼo puipui tonā maʼuli faka taumatuʼa pea ke ʼaua naʼa nā femaʼuʼaki he loto fefeka, ohage ko he “kolo mālohi.” Ko te tokoni ʼa Paulo ki te kau Kilisitiano ʼe faka ʼuhiga tāfito ki te hahaʼi ʼohoana: “Ke koutou kofuʼi ia te ʼofa, he ko he noʼo lelei ʼaupito ia ki he logo tahi.”—Kolose 3:14.

[Haʼuʼaga ʼo te paki pasina 32]

The Complete Encyclopedia of Illustration/J. G. Heck