Veliveli Kae Mālohi

KO ROBERT, ko te tagata kei tūpulaga mai Kanata, neʼe folau ʼi te Eulopa katoa ko tana kumi ʼaia he ʼuhiga ʼo te maʼuli. Neʼe sio ai ki te ʼu tuʼuga meʼa neʼe hake ai ʼi tona loto he lotovaivai ʼo ʼuhiga mo te ka haʼu.

ʼI tana heka ʼi te fale kafe ʼi Séville, ʼi Sepania, neʼe fakatoʼo age kia Robert te kiʼi pepa lotu e te kau Fakamoʼoni ʼa Sehova. ʼUluaki, neʼe mole tali e Robert. Neʼe ina ʼui fēnei: “Kae, neʼe ʼau lau te kiʼi pepa lotu. ʼE mole feala ke ʼau fakamahino, kae neʼe ʼau logoʼi te meʼa ʼe hoko fakapuna’maʼuli kia ʼau. Lolotoga taku ʼu folau, neʼe ʼau sio ki te ʼu faʼahiga lotovaivai ʼa te tagata, pea neʼe ʼau lotomamahi ʼi taku mole lava fetogi he meʼa. ʼI taku ʼosi lau te kiʼi pepa lotu, neʼe ʼau feʼekeʼaki, ‘ ʼE feala koa ke hoko moʼoni te “mālama foʼou” ʼaenī?’ Koia, neʼe ʼau manatu ai, ‘ ʼIo, ko te mālama foʼou ʼaenī ʼe feala ke hoko moʼoni.’ ”

ʼAki he ʼamanaki kua fakafoʼou, neʼe faitohi ia Robert ki te pilō ʼo te kau Fakamoʼoni ʼa Sehova ʼi Kanata, ʼo ina fakaʼui ai ke ʼaʼahi ia ia e he tahi ʼi tana liliu ʼaē kio ʼona pea mo tokoni age ki ai ke mahino ki te Tohi-Tapu.

ʼE mahino ia, ko te ʼu palalau ʼaē ʼe tala gutu ʼe mālohi. Kae, ʼaua naʼa tou meʼa noa te mālohi ʼo te logo ʼaē ʼe tā ʼi te lauʼi pepa. ʼO mole lauʼia tanatou veliveli, ko te ʼu tohi ʼaē ʼe fakatafito ki te Tohi-Tapu ʼe nātou mālolohi. ʼE nātou lave ʼi te ʼatamai pea mo te loto, ʼo ʼaumai ai he ʼamanaki moʼoni ki te ka haʼu.—Hepeleo 4:12.