Neʼe Nātou Fai Te Faʼahi ʼAia ʼUhi Ko Te ʼOfa
KO TE fafine vitua agatonu pea mo tali kāiga ʼi te fenua ʼo Kanata neʼe ina taupau tana ʼu taʼahine e toko fā ko he ʼu Kilisitiano moʼoni. Neʼe tokagaʼi e te ʼu tagata ʼāfea ʼo te kokelekasio neʼe ʼaoga ki te ʼapi ʼo te fafine vitua ʼaia ke toe fakafoʼou. Neʼe mole maʼu e te fafine ʼaia te falā pea mo te poto ke ina fai te gāue ʼaia. Koia, ʼo mulimuli ki te pelesepeto ʼaē ʼe ʼui ia 1 Timoteo 5:9, 10, neʼe fakatuʼutuʼu e te ʼu tagata ʼāfea ke fai te gāue maʼa ia, ʼo nātou fai kae ʼaua naʼa fakatokagaʼi. ʼO feafeaʼi?
Neʼe fai te fakatuʼutuʼu ke mavae te fafine vitua pea mo tana fānau mai tonatou ʼapi lolotoga ʼaho e nima. Neʼe laka age ʼi te toko 80 hahaʼi ʼo te kokelekasio neʼe nātou foaki tanatou tokoni ʼaki tonatou loto katoa, ʼaki te ʼu meʼa ʼofa fakakoloa, he falā, pea mo tonatou temi. ʼI te hili pe ʼo te mavae ʼa te famili, ko te kau gāue, ʼaki he loto fiafia, neʼe nātou ʼōmai fakahahaʼi ki te ʼapi ohage ko he ʼu lago meli. Neʼe fakatokatoka katoa te ʼu meʼa ʼaē ʼi tuʼa ʼo te ʼapi. Neʼe mono te ʼu pu ʼo te ʼu kaupā pea neʼe pena. Neʼe kilisi te fāliki ʼo te ʼapi pea neʼe fakafoʼou. Neʼe fola te carrelage pea neʼe ai te tapi foʼou. Ko te ʼu meʼa fuli ʼo ʼuhiga mo te hila neʼe toe gaohi fakaleleiʼi. Māʼia mo te ʼu meʼa ʼaē kua maumau neʼe fetogi fuli. Ko te toe fakafoʼou katoa neʼe fakahoko ʼi te ʼu ʼaho pe e nima!
Ko te ʼaluʼaga fakafiafia pea mo te gāue neʼe malave vave ki te ʼu vāhaʼa fale. ʼI te malave mālohi ʼo te ʼu faiga ʼa te kau Fakamoʼoni ki te tagata ʼo te vāhaʼa fale kua taʼu 80, neʼe ina foaki tana meʼa pena pea neʼe ina kole ke tokoni kia nātou. Ko te patolo ʼa te tahi neʼe kau ʼi te kau gāue ʼaia, neʼe ina foaki he masini ʼe ina faka ʼaele te gutuʼumu ʼo te fale kuka. Ko te tahi patolo neʼe ina foaki he ʼu puha foʼou ʼo te fale kuka. Ko te tahi tagata, ʼi te malave lahi kia ia te meʼa ʼaia, neʼe ina fia ʼiloʼi lelei pe ko ai te kau Fakamoʼoni ʼa Sehova. Neʼe ina tali ai te tohi E Feala Keke Mauli O Heegata Ite Palatiso Ite Kele.
Neʼe hā lelei te punamaʼuli ʼa te fafine vitua pea mo tana ʼu taʼahine ʼi tanatou liliu mai. Neʼe lahi te hali ʼo te ʼu loʼimata, te fekataʼi, pea mo te ʼu fakamālo—he temi ʼe mole galoʼi ʼo te ʼofa pea mo te lave ʼi te ʼu loto ʼa te kau Kilisitiano. ʼE mahino papau ia, ko te ʼofa pea mo te tokaga moʼoni kia nātou ʼaē ʼe ʼaoga ki ai ʼi te kokelekasio ʼe ko he fakaʼiloga ʼo te Lotu Faka Kilisitiano moʼoni, ʼaē neʼe tohi fēnei ai e Paulo: “Koia, ʼi te temi fuli pe ʼaē ʼe tou maʼu ai hotatou temi faigamālie, tou fai te meʼa ʼaē ʼe lelei ki te hahaʼi fuli pe, kae tāfito foki kia nātou ʼaē ko ʼotatou ʼu kāiga ʼi te tui.”—Kalate 6:10.