ʼE Feala Ke Koutou Maʼu “Te Mafu ʼo Te Laione”
ʼI ʼIHI temi ʼe fakaʼaogaʼi e te Tohi-Tapu te laione moʼo fakatātā ʼo te lototoʼa pea mo te falala. ʼE ʼui ʼo ʼuhiga mo te ʼu tagata lototoʼa, ʼe nātou maʼu “te mafu ʼo te laione,” pea ʼe ʼui ʼo ʼuhiga mo te faitotonu “ ʼe hage ko he laione mui ʼe ina maʼu te loto falala.” (2 Samuele 17:10; Tāʼaga Lea 28:1) Tāfito mokā tauʼi te laione, pea ʼe ina fakahā ʼe tau mo ia tona fakahigoa ʼaē ko te manu “ ʼe mālohi tokotahi age ʼi te ʼu manu fuli.”—Tāʼaga Lea 30:30.
Ko te lototoʼa ʼo te laione ʼe tatau mo te loto tāfito ʼa Sehova ʼAtua ke ina puipui tana hahaʼi. ʼE ʼui fēnei ia Isaia 31:4, 5: “Ohage pe ko te gugulu ʼa te laione, ʼio te laione kei mui, ki te meʼa ʼaē ka ina kai, mokā fakatahitahi he kau tagata taupau ōvi ʼo fakafeagai kia ia, pea māʼiape la mo tonatou ʼu leʼo ʼe mole mataku ia, pea māʼiape la mo tanatou logoaʼa ʼe mole lotovaivai ia; ʼo toe feiā anai mo te hifo mai ʼa Sehova ʼo te kautau ki te tau ʼo ʼuhiga mo te Moʼuga ʼo Sione . . . ʼI tana puipui ia ia, ʼe mahino ia ʼe ina hāofaki anai ia ia. ʼI tana fakahāo ia ia, ʼe ina fakahola anai ia ia.” Koia ʼe fakamoʼoni e Sehova ki tana ʼu kaugana, ʼe tokaga anai kia nātou, tāfito mokā nātou felāveʼi mo te ʼu faigataʼaʼia.
ʼE fakatatau e te Tohi-Tapu te fili lahi ʼo te hahaʼi, ia Satana te Tevolo, ki he laione ʼe gugulu pea mo kaikai. Ke ʼaua naʼa tou liliu ko hana meʼa kai, ʼe ʼui fēnei mai e te Tohi-Tapu kia tatou: “Koutou nonofo ʼalaʼala, koutou nonofo tokaga.” (1 Petelo 5:8) Ko he faʼahiga fai ʼo te faʼahi ʼaia, ʼe ko te tekeʼi ʼo te tulemoe ʼi te faʼahi fakalaumālie. Neʼe ʼui fēnei e Sesu ʼo ʼuhiga mo te faʼahi ʼaia: “Ke koutou tokaga kia koutou totonu, talia naʼa mamafa tokotou ʼu loto ʼi te lahi fau ʼo te kai, pea mo te lahi fau ʼo te ʼinu, pea mo te ʼu tuʼania ʼo te maʼuli.” (Luka 21:34-36) ʼIo, ko te nonofo ʼalaʼala ʼi te “ ʼu ʼaho fakamuli” ʼaenī, ʼe feala ke ina foaki mai kia tatou “te mafu ʼo te laione,” ko tona faka ʼuhiga ko he tahi ʼe ‘mālohi, ʼe falala kia Sehova.’—2 Timoteo 3:1; Pesalemo 112:7, 8.