Ko Te Moʼoni ʼo ʼUhiga Mo Te ʼIfeli

NEʼE ʼui fēnei e te kautahi sivi akonaki ʼo te ’Ēkelesia ʼo Pilitania, ko te ʼifeli ʼe mole kei ʼui ʼe ko he gutuʼumu kakaha; kae ʼe mole ko he potu ʼe mole moʼoni ia pea ʼe mole ʼi ai he meʼa ʼi ai. ʼE fakamahino fēnei e te kautahi ʼaia “ ʼE lahi te ʼu tupuʼaga ʼo te fetogi ʼaia. Kae ʼi te ʼu tupuʼaga ʼaia, ʼe kau ai te fakafihi ʼa te hahaʼi lotu pea mo nātou ʼaē ʼe mole lotu, ki te lotu ʼo te fakamataku, pea ʼe nātou mahino ko te ʼui ko te ʼAtua ʼaē ʼe ina fakatūʼa te lauʼi miliona hahaʼi ki te fakamamahi heʼegata, ʼe fakafeagai ki te fakahā e te ʼAtua ia tona ʼofa ʼaki ia Kilisito.”

ʼE mole ko te ’Ēkelesia ʼo Pilitania tokotahi pe ʼaē ʼe fakafisi ki te manatu māhani ʼo ʼuhiga mo te ʼifeli. Ko te hahaʼi ʼo te ʼu lotu kehekehe, ʼi tanatou manatu ʼe ko he meʼa faigataʼa te tauhi ki he ʼAtua lagakava ʼe ina tutu te kau agahala ʼi te afi. ʼE ʼui fēnei e Jackson Carroll, ko te tagata faiako faka lotu pea mo faka sosiete ʼi te faleako Duke University’s Divinity, “ ʼe loto te hahaʼi ki he ʼAtua agaʼofa pea ʼe nātou fia fakaōvi ki he faʼahiga ʼAtua feiā. Ko te palalau ʼo ʼuhiga mo te hala pea mo te agahala ʼe fakafeagai ia ki te manatu ʼa te hahaʼi ʼo te temi ʼaenī.”

Talu mai fualoa, neʼe akoʼi e te kau Fakamoʼoni ʼa Sehova ko te ʼifeli, ʼo mulimuli ki te akonaki ʼo te Tohi-Tapu, ʼe ko te faitoka ʼaē ʼe ʼolo kiai te kau mate fuli​—kae mole ko he potu ʼe fakamamahi ai te hahaʼi ʼi te afi. ʼE mole nātou fai te akonaki ʼaia koteʼuhi ʼe leleiʼia e te hahaʼi, kae koteʼuhi ʼe ʼui fēnei e te Tohi-Tapu: “Ko te kau mate, ʼe mole kei nātou ʼiloʼi he meʼa e tahi . . . ʼE mole he gāue, he fai puleʼaki, he mālama, he poto ʼi te Seole [“ ʼifeli,” ʼi te Tohi-Tapu Katolika ʼo Douay.]”​—Tagata Tānaki 9:​5, 10.

ʼAki te fakamahino lelei ʼaia ʼo ʼuhiga mo te ʼaluʼaga ʼo te kau mate, ko Charles Taze Russell, te ʼuluaki pelesita ʼo te Sosiete Watch Tower, neʼe ina tohi fēnei ʼi te taʼu 1896: “ ʼE mole tou maʼu [ʼi te Tohi-Tapu] he potu feiā ʼe fai ai he ʼu fakamamahi ʼo heʼegata, ohage ko tona akoʼi hala e ʼihi akonaki pea mo tohi faka lotu. Kae ʼe tou maʼu he ‘ ʼifeli,’ he seole, mo he hatesi, ʼaē neʼe fakatūʼa ai tatou ke tou ʼolo fuli kiai, ʼuhi ko te agahala ʼa Atama, pea ʼaki te mate ʼo totatou ʼAliki, kua feala ke mavae te hahaʼi fuli mai ai; pea ko te ‘ ʼifeli’ ʼaia ʼe ko te faitoka​—te mate.”

Koia, kua hili kiai te sēkulō, neʼe akoʼi e te kau Fakamoʼoni ʼa Sehova te moʼoni faka Tohi-Tapu ʼaia ʼo ʼuhiga mo te ʼifeli.

[Paki ʼo te pasina 32]

Charles T. Russell