‘ ʼE ʼAu Hola Anai Ki Te ʼAtua’
ʼI TE ʼu “temi maʼuhiga ʼaupito mo faigataʼa” ʼaenī, ʼe fakaʼāsili kovi te ʼu fakahala pea mo te ʼu fihifihia. Ohage la, ko tatatou aga fakahagatonu ʼe feala ke ʼahiʼahiʼi ʼi te gāue. ʼE feala ke ʼahiʼahiʼi tatatou aga fakapoipoi e totatou ʼu kaumeʼa ʼi te faleako. Pea ko tatatou agatonu ʼe tau ʼahiʼahiʼi ʼuhi ko te mālama aga fakahehema ʼaenī.—2 Timoteo 3:1-5.
Ko te tagata faitohi ko Asafe neʼe toe maʼuli foki mo ia ʼi te temi neʼe lahi ai te agakovi. Māʼiape la mo ʼihi ʼi te hahaʼi ʼo tona temi neʼe nātou laupisi ki tanatou aga heʼe faka lotu. Neʼe tohi fēnei e Asafe: “Ko tanatou fialahi neʼe hage ko he kahoa kia nātou. Ko te agamālohi ʼe ina ʼaofi nātou ohage ko he kofu. ʼE nātou manuki pea mo nātou palalau ʼo ʼuhiga mo te meʼa ʼaē ʼe kovi; ʼo ʼuhiga mo te kaihaʼa ʼe nātou palalau fakavikiviki kiai.” (Pesalemo 73:6, 8) Ko te aga ʼaia ʼe ko he meʼa ʼe koutou sio māhani koa kiai?
Kia nātou ʼaē ʼe nātou fia fai te meʼa ʼaē ʼe tonu, ko te aga ʼaia ʼe fakatupu lotohoha pea mo fakaloto mamahi. Neʼe tagi fēnei ia Asafe: “Neʼe ʼau liliu ʼo taʼomia ʼi te ʼaho katoa. Neʼe ko he meʼa fakamamahi ki ʼoku mata.” (Pesalemo 73:14, 16) ʼE lagi feiā mo koutou, kae ke ʼaua naʼa koutou lotovaivai! Neʼe lava kātakiʼi e Asafe te agakovi ʼo tona temi, pea ʼe toe feala pe foki mo koutou. Kae ʼo feafeaʼi?
Neʼe mahino kia Asafe ko te faitotonu moʼoni neʼe mole feala ke maʼu ʼi te pule heʼe haohaoa ʼa te tagata. (Pesalemo 146:3, 4; Tāʼaga Lea 17:23) Koia ko Asafe neʼe mole ina faka pulinoa tona temi maʼuhiga, tona mālohi pea mo tana ʼu koloā ʼo ina faigaʼi ke ina pulihi te agakovi fuli ʼaē neʼe hoko ʼi ʼona tafa, kailoa, kae neʼe tokaga tāfito ia ki tana ʼu felogoi mo te ʼAtua. Neʼe ʼui fēnei e Asafe: “Kae kia te ʼau, ko te fakaōvi ʼaē ki te ʼAtua ʼe ko he meʼa lelei ia kia ʼau. Neʼe ʼau kumi toku holaʼaga ki te Tuʼi ʼAliki ko Sehova, moʼo kalagaʼi tau ʼu gāue fuli.”—Pesalemo 73:28.
Ia ʼaho nei, ko nātou ʼaē ʼe nātou fai he ʼu kākā ʼi te gāue, ʼe nātou tautau maʼu ai te ʼu koloā. Pea ko te tokolahi ʼe lagi nātou fialahi ʼi tanatou meʼa noaʼi te ʼu lao fakaʼatua ʼo ʼuhiga mo te ʼu aga ʼaē ʼe tonu ke fai. Kae ʼe mole nātou maʼuʼuli anai ʼo talu ai. Neʼe fakatokagaʼi fēnei e Asafe: “ ʼE mahino papau ia ʼe ke tuku nātou ki he kele ʼe mahekeheke. Neʼe ke maumauʼi nātou.”—Pesalemo 73:18.
ʼIo, ʼi te temi ʼaē kua fakatuʼutuʼu e te ʼAtua, ʼe pulihi ai anai te kākā, te agamālohi pea mo te aga fakahehema pea mo te tahi ʼu aga heʼe faka lotu ʼaē ʼe tonu ke tekeʼi e te kau Kilisitiano moʼoni. ʼE fakapapau fēnei e te Tohi-Tapu: “ ʼE molehi anai te hahaʼi agakovi, kae ko nātou ʼaē ʼe falala kia Sehova ʼe nātou maʼu anai te kele.” (Pesalemo 37:9) Kae ʼi tatatou talitali ke hoko te faʼahi ʼaia, tou faka mafola te ʼu palalau ʼa te tagata fai pesalemo ʼaē neʼe ina ʼui fēnei: “Ko Sehova ʼe ko toku Maka, pea ko toku tule mālohi, pea ʼe ko Ia ʼaē ʼe ina fakahāo ʼau. Ko toku ʼAtua ʼe ko toku mata maka. ʼE ʼau hola anai kia te ia.”—Pesalemo 18:2.