ʼE Fakaʼauha Anai Koa e Te ʼAtua Te Mālama?
ʼO MULIMULI ki te manatu ʼo te Tuʼi Tapu ko Soane Paulo 2, ʼe feala ke falala te hahaʼi ki te ka haʼu. Neʼe ina fakatokagaʼi, ʼi te hisitolia, “neʼe hoko atu te agahala ʼa te tagata, pea neʼe lagi kovi age ia ʼi te ʼu agahala ʼaē ʼe ʼui neʼe hoko ʼi muʼa ʼo te lōmaki.” Logope la te faʼahi ʼaia, kae neʼe fakamahino fēnei e te tuʼi tapu, “ ʼi te ʼu palalau ʼaē neʼe fai e te ʼAtua ʼi tana fuakava mo Noe, ʼe tou mahino ai ʼe mole he agahala ʼi te temi ʼaenī ʼe feala ke ina uga te ʼAtua ke ina fakaʼauha te mālama ʼaē neʼe ina fakatupu.”
ʼE moʼoni koa ʼe mole he temi ʼe fakaʼauha ai anai e te ʼAtua te mālama? ʼE ʼui e te Tohi-Tapu, ʼi te hili ʼo te Tulivio, neʼe ʼui fēnei e te ʼAtua kia Noe: “ ʼE mole toe molehi anai he kakano ʼaki te ʼu vai ʼo he tulivio, pea ʼe mole toe ʼi ai anai he tulivio moʼo maumauʼi te kele.” (Senesi 9:11) ʼE ʼui e te tui tapu, ʼaki te ʼu palalau ʼaia, ko te ʼAtua “neʼe ina fakapapau ʼe mole ina maumauʼi anai [te kele].”
ʼE fakahā lelei mai e te Tohi-Tapu ʼe mole fakagafua anai e te Tupuʼaga ke fakaʼauha totatou kele. ʼE ʼui fēnei e te Tohi-Tapu: “Ko te kele ʼe tuʼu maʼu ʼo aʼu ki he ʼu temi ʼe mole ʼiloʼi honatou gataʼaga.” (Tagata Tānaki 1:4) Kae ʼe lahi age te meʼa ʼe tou ako ʼo ʼuhiga mo te Tulivio—ko he manatu neʼe mole talanoa kiai te tuʼi tapu.
Neʼe ʼui e Sesu ko te ʼu ʼaluʼaga ʼaē ka hoko anai ʼi te kele ʼi tana ʼi henī ʼi te temi ka haʼu, ʼe hage pe anai “ko te ʼu ʼaho ʼaē ʼo Noe,” ko te hahaʼi “neʼe mole nātou fakatokagaʼi he meʼa ʼo aʼu ki te haʼu ʼo te tulivio pea ʼave ai ia nātou fuli.” (Mateo 24:37-39) ʼO toe feiā pe, neʼe tohi fēnei e te ʼapositolo ko Petelo, ohage pe “ko te mālama ʼo te temi ʼaia neʼe fakaʼauha ʼaki te lōmaki ʼi te vai,” koia ʼe toe hoko anai ki te mālama ʼaenī “te ʼaho ʼo te fakamāu pea mo te fakaʼauha ʼo te hahaʼi ʼaē ʼe mole pipiki ki te ʼAtua.”—2 Petelo 3:5-7.
Neʼe galo koa kia Sesu pea mo Petelo te fuakava ʼaē neʼe fai e te ʼAtua mo Noe? Kailoa ia! Ohage pe ko te meʼa ʼaē neʼe ina ʼui ʼi tana fuakava mo Noe, ʼe mole fakaʼaogaʼi anai e te ʼAtua he lōmaki moʼo molehi te tuʼu ʼo te ʼu faʼahiga meʼa agakovi ʼaenī. Kae ʼe ina fakaʼaogaʼi anai te mālohi ʼo te “Hau ʼo te ʼu hau pea mo te ʼAliki ʼo te ʼu ʼaliki,” ia Sesu Kilisito. (Fakahā [Apokalipesi] 19:11-21) Koia, ʼo mulimuli ki te Tohi-Tapu, ʼe mole maumauʼi anai te kele, kae ʼe mahino papau ia ʼe molehi anai te “mālama” ʼo te hahaʼi agakovi. (Tāʼaga Lea 2:21, 22; Fakahā 11:18) Ki muli age, “ ʼe maʼu anai te kele e te kau faitotonu, pea ʼe nātou nonofo ai anai ʼo talu ai.”—Pesalemo 37:29.