Ko He “Faʼifaʼitaki ʼo Te Logo Tahi Pea Mo Te Aga Fakatautehina”
Ko te ʼu palalau ʼaia neʼe fai e te fafine moʼo fakahā te ʼu meʼa ʼaē neʼe fai e te kau Fakamoʼoni ʼa Sehova ʼi tana lotomamahi ʼaupito ʼi te mate ʼo he tahi ʼi tona famili. ʼE ina fakamahino fēnei:
“Ko ʼau mo toku famili ʼe mātou fia fakamālo ki te kau Fakamoʼoni ʼa Sehova ʼo te kokelekasio lea faka Italia, ʼi Freiburg, ʼi Siamani. Ko toku famili ʼe mole ko he kau Fakamoʼoni ʼa Sehova, gata pe ki toku tēhina ko Antonio pea mo tona ʼohoana ko Anna. Talu mai fualoa ʼe mātou valoki tanā lotu, kae neʼe mātou fakaʼapaʼapa tuʼumaʼu kiai.
“Kae ʼi te temi nei, kua fetogi tamatou ʼu manatu ʼo ʼuhiga mo te faʼahi ʼaia. ʼI tona fakahagatonu, neʼe mātou sio ki he faʼifaʼitaki ʼo te aga fakatautehina pea mo te ʼofa, neʼe mole mātou ʼamanaki kiai.
“Meʼa fakaʼofaʼofa foki, he neʼe mate ia Anna ʼi te fakaʼī. Mai tona ʼaluʼaga ʼaē ʼe mātou nonofo ʼi Italia, koia neʼe faigataʼa ai tamatou tokoni kia Antonio pea mo tana fānau. Neʼe tokoni kia ia tona ʼu tēhina ʼo te kokelekasio. Neʼe nātou foaki te tokoni ʼaia ʼi tanatou ʼolo kiō ia, ʼo fakaloto mālohiʼi ia ia ʼaki ʼanatou ʼu palalau, mo tanatou tui, ʼo tokoni ki te fai ʼo te ʼu gāue pea mo lagolago kia ia ʼi te faʼahi ʼo te falā. Mai tona ʼaluʼaga ʼaē ʼe mole feala ke ʼau fakamālo totonu ki te kokelekasio, koia ʼe ʼau fia fakaʼaogaʼi takotou nusipepa moʼo fakamālo kia nātou, ʼuhi ko tanatou faʼifaʼitaki ʼo te logo tahi pea mo te aga fakatautehina ʼaē ʼe mole mātou galoʼi anai.”
ʼE ko he meʼa fakafiafia kia tatou te ʼu palalau fakafetaʼi ʼaia ʼa te fafine. Ohage ko te meʼa ʼaē neʼe ina ʼui, ko te kau Fakamoʼoni ʼa Sehova ʼe ko he fale tautēhina ʼi te malamanei katoa. (1 Petelo 2:17) ʼE nātou maʼuliʼi te ʼofa, heʼe nātou ʼiloʼi “ ʼe ko he noʼo haohaoa ia ki te logo tahi.” (Kolose 3:14) Māʼia mo te ʼu tuʼutāmaki fakamataku ʼaē ʼe feala ke hoko kia tatou fuli, kae ʼe pipiki mālohi te kau Fakamoʼoni ʼa Sehova ki te ʼAtua pea mo tana hahaʼi.—Tāʼaga Lea 18:24; Tagata Tānaki 9:11; Soane 13:34, 35.