Ko Te Puleʼaga ʼe Ina Vikiʼi Te Kau Fakamoʼoni

ʼI TE kolo ʼo Cádiz ʼaē ʼe tuʼu ʼi te matatai ʼo Sepania, ia kilometa e 500 ʼi te potu toga hihifo ʼo Madrid, ko te pule kolo ko Doña Teófila Martínez neʼe ina foaki te pale gigila (ʼaē ʼe hā ʼi te paki ʼi ʼoluga) ki te kau Fakamoʼoni ʼa Sehova. ʼE tohi fēnei ai: “Ko te kolo ʼo Cádiz ʼe fakamālo ki te kau Fakamoʼoni ʼa Sehova ʼuhi ko tanatou lagolago ki te ʼu gāue ʼo te kolo.” Koteā te meʼa ʼaē neʼe fai e te kau Fakamoʼoni ʼa Sehova ke tupu ai tonatou vikiʼi ʼaia?

Neʼe vikiʼi nātou ʼuhi ko te gāue ʼaē neʼe nātou fai moʼo fakafoʼou te tahi faʼahi ʼo te malaʼe faigaoʼi ʼo te kolo. Lolotoga ni ʼu fakaʼosi vāhaʼa, ko te toko lauʼi teau kau Fakamoʼoni neʼe nātou gāue moʼo fakafoʼou te ʼu fale vao ʼo te malaʼe ʼaka fitipolo ʼo Carranza. ʼI te temi nei, kua ʼaoga ki te hahaʼi fuli te ʼu tuio ʼaē neʼe fakapipiki ki te ʼu kaupā, pea mo te carrelage ʼaē neʼe fola ai.

Kua felogoi lelei te kau takitaki ʼo te kolo ko Cádiz pea mo te kau Fakamoʼoni ʼa Sehova. ʼI te taʼu fuli, ʼe nātou avahi te Malaʼe Faigaoʼi ʼo Carranza ke fai ai te fakatahi faka tisitilike ʼa te kau Fakamoʼoni ʼa Sehova. ʼUhi ko te faʼahi ʼaia, ʼe faiga e te kau Fakamoʼoni ke nātou tokaga ke lelei tuʼumaʼu te malaʼe ʼaia.

ʼO hilifaki ki te ʼu gāue ʼaia, ʼe ʼaʼahi tuʼumaʼu e te kau Fakamoʼoni ʼa Sehova te hahaʼi ʼo te kolo moʼo tokoni kia nātou ʼi te tahi faʼahi. ʼE nātou kalagaʼi te “logolelei” ʼo te Puleʼaga ʼa te ʼAtua. ʼE mahino ia, ʼe mole nātou fakahoko te gāue ʼaia ke tupu ai honatou vikiʼi e te tagata. Kae ʼe nātou fakahoko moʼo fakalogo ki te fakatotonu ʼa Sesu ke nātou faka mafola te “logolelei . . . o te puleaga” pea ke nātou “fakahoko he u tisipulo i te atu puleaga.” (Mateo 24:14; 28:19) ʼI tanatou fai te faʼahi ʼaia, ʼe fakaʼamu ai te kau Fakamoʼoni ʼa Sehova ke nātou tokoni ki te hahaʼi ʼo akoʼi nātou ʼi “te ala ʼo te faitotonu.”​—Tāʼaga Lea 12:⁠28.