“ ʼE Hage Anai Ko Hau Folau Vaka ʼi He Afā”

ʼI TAKOTOU manatu, ʼe mole ko he meʼa fakavale koa la ʼaia, pea mo fakatupu tuʼutāmaki? Kae ʼe ʼi ai ʼihi ʼe nātou fai te faʼahi ʼaia ʼi hona ʼaluʼaga fakatā. ʼO feafeaʼi? Ko te tagata faitohi Pilitania ʼo te 17 sēkulō ko Thomas Fuller, neʼe ina ʼui fēnei: “ ʼAua naʼa ke fai he meʼa mokā ke ʼita kovi. ʼE hage anai ko hau folau vaka ʼi he afā.”

Kapau ʼe kita fai he meʼa kae ʼe kita ʼita kovi ai, ka mole kita lava lolomi tokita ʼita, pea ʼe feala ke hoko ai te ʼu meʼa fakamataku. ʼE hā te faʼahi ʼaia ʼi te faʼifaʼitaki ʼaē ʼe fakamatala mai e te Tohi-Tapu. Ko Simeone pea mo Levi, te ʼu foha ʼo te pateliaka ko Sakopo, neʼe nā ʼiʼita lahi ʼo nā fia lagavaka ʼi te temi ʼaē neʼe fakaʼalikiʼi ai tonā tokolua ko Tina. Neʼe tupu ai te fakapō pea mo te kaihaʼa lahi. ʼE tou mahino ai ki te ʼu palalau ʼaenī ʼa Sakopo ʼaē neʼe ina tauteaʼi tanā agakovi: “Neʼe koulua fakaufiufiʼi ʼau, ʼo koulua fakaliliu ʼau ko he meʼa ke manukinukiʼi e te hahaʼi ʼo te fenua.”​—Senesi 34:25-​30.

Kae ʼe tuku mai e te Tohi-Tapu he tokoni fakapotopoto ʼo ʼuhiga mo te faʼahi ʼaia, ʼo ina ʼui fēnei: “Situʼa ki te ʼita pea mo ke līaki te fakafutafuta; ʼaua naʼa ke pukea naʼa ke fai he meʼa ʼe kovi.” (Pesalemo 37:8) Kapau ʼe tou mulimuli ki te tokoni ʼaia, pea ʼe feala ke tou puipui ia tatou mai te fai ʼo he ʼu agahala mamafa.​—Tagata Tānaki 10:4; vakaʼi mo Tāʼaga Lea 22:24, 25.