Te Tokoni ʼo ʼUhiga Mo Te Fili ʼo He ʼu Kaumeʼa Lelei

ʼE ʼUI e te alatike ʼo te Reader’s Digest, ko te kau tūpulaga ʼe nātou ʼolo ʼo kumi tokoni ki tonatou ʼu kaumeʼa kae mole nātou ʼolo ki tonatou ʼu mātuʼa, ʼo ʼuhiga mo te faʼahiga teu pea mo te musika ʼaē ʼe nātou loto kiai. Koia ʼe maʼuhiga ʼaupito ki te ʼu mātuʼa ke nātou ʼiloʼi pe ko ai te ʼu kaumeʼa ʼo tanatou ʼu fānau pea ko te ʼu potu fea ʼaē ʼe nātou fakatahi ai.

ʼE ʼui e Esmé van Rensburg, te polofesea ʼo te selevisi ʼo te psychologie ʼi te univelesitē ʼo Afelika Saute: “Ko tokotou maʼua ke koutou vakaʼi te faʼahi ʼaia.” Pea ina toe ʼui fēnei: “ ʼE mahino ia, ʼe ʼita anai takotou fānau kia koutou, kae ʼe nātou toe malū ifo anai.” ʼOsi ʼaia pea ina fai ki te ʼu mātuʼa te ʼu kiʼi tokoni ʼaenī. ʼE tonu ke fakapotopoto te ʼu lekula pea ke nātou fakatafito ki he ʼu pelesepeto ʼe totonu; koutou fakalogo ki te ʼu meʼa ʼaē ʼe fia ʼui atu e takotou ʼu fānau; ʼaua naʼa koutou hoko ʼita, kae koutou loto lolomi pea koutou ʼiloʼi pe koteā te meʼa ʼaē ʼe koutou fia ʼui age kia nātou. Kapau ko takotou fānau neʼe kua kamata fakatahi mo he fakakaugā kovi, koutou fakahā age kia ia te ʼu fua kovi ʼo te fakakaugā ʼaia, kae ʼaua naʼa koutou tapuʼi age pe tana fakakaugā mo ia.

Talu mai fualoa ko te Tohi-Tapu, te Folafola ʼa te ʼAtua, kua ina foaki mai te ʼu tokoni lelei ki te ʼu mātuʼa. Ohage la, ʼe ʼui ai fēnei: “Ke vave te fagono a te tagata fuape, ke fakatokatoka ki te lea, mo maiko ki te ita.” (Sakopo 1⁠:19) ʼE toe fai foki e te Tohi-Tapu te tokoni ʼaenī ʼo ʼuhiga mo tokita ʼu kaumeʼa: “Ko ʼaē ʼe haʼele mo te kau popoto ʼe liliu anai ia ʼo poto, kae ko ʼaē ʼe fakatahi mo te kau vale, ʼe fua kovi anai kia ia.” (Tāʼaga Lea 13⁠:20) Ko te ʼu faʼifaʼitaki ʼaia ʼe fakahā lelei ai te poto ʼaē ʼe feala ke maʼu e te hahaʼi ʼaē ʼe nātou lau te Tohi-Tapu ʼaki he loto fakafetaʼi pea mo nātou maʼuliʼi ʼi te ʼaho fuli.