Ko Te Taʼu Makehe Ki Te Tufa ʼo Te Tohi-Tapu

KUA lahi ʼaupito te hahaʼi ʼaē ʼe ʼi ai tanatou Tohi-Tapu. Neʼe fai te sivi ʼaia e te ʼu Sosiete Faka Tohi-Tapu Fakatahi ʼo ʼuhiga mo te tufa ʼo te Tohi-Tapu ʼi te taʼu 1998, he neʼe tuputupu tona tufa ʼi te vaelua miliona mokā fakatatau mo te taʼu ki muʼa atu. ʼI te malamanei katoa, neʼe tufa te ʼu Tohi-Tapu katoa peʼe fakakoga e 585 000 000. ʼE toe ʼui e te sivi ʼaia: “ ʼE ko he meʼa fakaloto mālohi. Kua kaugamālie ʼaupito ia ʼaho nei te hahaʼi ʼaē ʼe fakaaʼu ki ai te Folafola ʼa te ʼAtua ia ʼaho nei.”

ʼE mahino papau ia, ʼe mole tatau te maʼu ʼo hakita Tohi-Tapu pea mo tona lau. Ohage la, neʼe fakahā e te sivi, ko te toko 90 ʼi te teau ʼo te kau Amelika, ʼe ʼi ai tanatou Tohi-Tapu pea ko te kaugamālie ʼaia ʼe nātou manatu ʼe feala ke akoʼi mai e te Tohi-Tapu te aga ʼaē ʼe tonu ke fai. Kae ko te toko 59 pe ʼi te teau neʼe nātou ʼui ʼe nātou vakaʼi te Tohi-Tapu ke nātou maʼu ai he ʼu tokoni. Pea neʼe ʼui e te toko 29 ʼi te teau, ʼe mole nātou ʼiloʼi lelei te Tohi-Tapu peʼe mole nātou ʼiloʼi pe koteā ʼaē ʼe talanoa kiai.

Ko te kau Fakamoʼoni ʼa Sehova ʼe nātou tā pea mo tufa te ʼu Tohi-Tapu, pea ʼe nātou toe fai foki he ʼu ako Tohi-Tapu mo te hahaʼi ia fenua e 230 tupu. ʼI te temi nei, ʼe fai te polokalama ako faka Tohi-Tapu ʼaia ki te toko lauʼi miliona hahaʼi ʼi te malamanei katoa. ʼE tokoni kia nātou ke nātou tauʼi tonatou ʼu fihifihia, pea ʼe nātou ako te ʼu meʼa ʼaē ʼe fakamatalatala e te Tohi-Tapu ʼo ʼuhiga mo te ka haʼu taulekaleka ʼi te takitaki ʼo te Puleʼaga ʼo te ʼAtua.​—Isaia 48⁠:​17, 18; Mateo 6:​9, 10.

[Paki ʼo te pasina 32]

ʼE fai he ʼu ako Tohi-Tapu (mai te hema ki te mataʼu, ʼo kamata ʼi ʼoluga) ʼi Polivia, mo Ghana, mo Sri Lanka, pea mo Pilitania