ʼE To Te Pulapula e Te Tagata Fai Mata Sioʼata

Koteā te pikipikiga ʼo te ʼu faiga ʼa te tagata fai mata sioʼata ʼi Lviv, ʼi Ukraine, mo te fakatuʼu ʼo te kokelekasio lea faka Lusia ʼo te kau Fakamoʼoni ʼa Sehova ʼi Haïfa, ʼi Iselaele, ʼe vaha ʼi te ʼu tuʼuga fenua pea ʼe nā vaha ia kilometa e 2 000? ʼE fakahāhā e te hisitolia ʼaenī te moʼoni ʼo te talanoa faka Tohi-Tapu ʼo Tagata Tānaki 11:6: “ ʼI te uhu to tau pulapula pea ʼo aʼu ki te afiafi ʼaua naʼa ke fakamālōlō tou nima, heʼe mole ke ʼiloʼi pe kofea te potu ʼaē ka fua ai anai.”

ʼE KAMATA tatatou hisitolia ʼi te taʼu 1990 ʼi te temi ʼaē neʼe kei nofo ai ʼi Lviv, ia Ella, te taʼahine Sutea. Neʼe teuteu mavae ia Ella mo tona famili ki Iselaele. ʼI te kiʼi temi siʼi ʼi muʼa ʼo tanatou hiki ki te fenua ʼaia, neʼe tonu ke ʼalu ia Ella ki te tagata fai mata sioʼata, ʼaē neʼe ko te Fakamoʼoni ʼa Sehova. ʼI te temi ʼaia, neʼe tapu te gāue ʼa te kau Fakamoʼoni ʼa Sehova ʼi Ukraine. Kae logope la te faʼahi ʼaia, neʼe fakatuʼutuʼu te tōketā ke ina faka mafola tana tui kia Ella. Neʼe punamaʼuli ia Ella ʼi tana ʼui age ʼaē ʼe ʼi ai te higoa ʼo te ʼAtua. Neʼe fia ʼiloʼi e Ella, ʼo toe hoko ai tana palalau lelei ki te Tohi-Tapu.

Neʼe leleiʼia ʼaupito e Ella te fai palalau ʼaia pea neʼe ina kole ke nā toe fai palalau feiā ʼi te ʼu vāhaʼa ʼaē ka hoa mai. Neʼe tuputupu tana fia ʼiloʼi ia te Tohi-Tapu, kae neʼe ʼi ai te fihifihia. Neʼe kua fakaōvi mai te temi ʼaē ke ʼolo ai te famili ki Iselaele. Neʼe kei lahi te ʼu meʼa neʼe tonu ke ʼiloʼi e Ella! Moʼo fakaʼaogaʼi lelei te temi ʼaē neʼe kei toe, neʼe ina fakaʼui he ako Tohi-Tapu ʼi te ʼaho fuli ʼo kaku ki tana mavae. Logope neʼe mole toe toʼo atu aipe te ako ʼa Ella ʼi te temi ʼaē neʼe tau ai ki Iselaele, kae neʼe kua tau aka te pulapula ʼo te moʼoni ʼi tona loto. ʼI te fakaʼosi taʼu, neʼe ina toe toʼo fakalelei tana ako Tohi-Tapu.

Pea hoko te tau ʼi te Golfe Persique, pea neʼe fakatō e Ilakia te ʼu foʼi pulu ki Iselaele. Neʼe tautau palalau te hahaʼi ki te faʼahi ʼaia. Fokifā pe ʼi te tahi ʼaho ʼi te fale koloā lahi, neʼe logo ia Ella ki te famili ʼe palalau faka Lusia, ko he famili neʼe hoki ʼōmai pe ki te fenua. Logope neʼe kei lolotoga ako te Tohi-Tapu, kae neʼe fakaōvi age ia Ella ki te famili pea ina kamata fakahāhā age te ʼu fakapapau faka Tohi-Tapu ʼa te ʼAtua ʼo ʼuhiga mo he mālama tokalelei. Ko te meʼa ʼaē neʼe hoko ai, ko te kui fafine ko Galina, mo te faʼe ko Natasha, mo te tama ko Sasha (ko tona tahi higoa ko Ariel), pea mo te taʼahine ko Ilana neʼe nātou kau fuli ki te ako ʼa Ella.

Neʼe ko Sasha ʼaē neʼe ʼuluaki papitema ʼi te famili—logope te ʼu ʼahiʼahi lahi ʼaē neʼe tau mo ia. Logola neʼe lelei tana ako, kae neʼe fakamavae ʼi te faleako, koteʼuhi neʼe mole tali e tona leʼo ʼo loto faka Kilisitiano ke kau ki te ʼu akoako tau, ʼaē neʼe fakamaʼua e te faleako. (Isaia 2:2-4) Neʼe ʼave te fihifihia ʼo Sasha ki te Telepinale Lahi ʼi Selusalemi, pea neʼe fakatotonu ai ke toe fakahū ia Sasha ki te faleako ke ina fakaʼosi fakalelei tana ako. Neʼe ʼiloʼi e te fenua katoa te meʼa ʼaia neʼe hoko. ʼO feala ai ki te kau Iselaele tokolahi ke nātou ʼiloʼi te ʼu akonaki ʼa te kau Fakamoʼoni ʼa Sehova.a

ʼI tana ʼosi maʼu tona pepa mai te univelesitē, neʼe kamata gāue pionie ia Sasha. ʼI te temi nei, ʼe gāue pionie makehe pea ʼe ko te tagata ʼāfea. Kua toe kau mai kiai tona tuagaʼane veliveli, ia Ilana, ki te gāue pionie. Ko tanā faʼe pea mo tanā kui fafine kua nā papitema mo nāua. Neʼe kei hoko atu pe te fua ʼo te pulapula ʼaē neʼe to e te tagata fai mata sioʼata!

Lolotoga te temi ʼaia, neʼe tuputupu ia Ella ʼi te faʼahi fakalaumālie pea neʼe kamata fai faka mafola ʼi te ʼu ʼapi. ʼI tana ʼuluaki matapā, neʼe felāveʼi ia Ella mo Faina, ʼaē neʼe hoki tau mai pe mai Ukraine. Neʼe lotomamahi ʼaupito ia Faina. Ki muli age neʼe hoki ʼiloʼi e Ella ʼi muʼa ʼo tana fisifisi ki te ʼapi ʼo Faina, neʼe faikole fēnei te fafine lotomamahi ʼaia ki te ʼAtua: “ ʼE mole ʼau ʼiloʼi peʼe ko ai ia koe, kae kapau ʼe ke logo mai kia te ʼau, pea ke tokoni mai.” Neʼe lelei tanā fai palalau. Neʼe lagaʼi e Faina te ʼu tuʼuga fehuʼi pea neʼe ina fakakaukauʼi lelei te ʼu tali ʼaē neʼe fai age ki ai. ʼAki te temi, neʼe mālama ai kia ia ʼe akoʼi e te kau Fakamoʼoni ʼa Sehova te moʼoni mai te Tohi-Tapu. Neʼe ina fetogi tana polokalama ako ʼi te univelesitē ke lahi te temi ʼaē ʼe fakatahi ai mo te kokelekasio pea mo te fai ʼo te faka mafola. ʼI Maio 1994, neʼe papitema ai ia Faina. ʼO feiā mo ia, neʼe gāue pionie, kae neʼe gāue vaeluaʼi temi ki te olotinatea.

ʼI Novepeli 1994, lolotoga tana gāue fai faka mafola, fokifā pe neʼe logo gaʼegaʼe ʼosi. Neʼe ʼalu ki te lopitali pea neʼe fakahā age ai kua lavea tona gākau pea ʼe ʼalu tona toto. ʼI te afiafi ʼaia neʼe hifo te toto ʼo Ella ʼo aʼu ki te 7,2. Neʼe fakatoʼo e te tagata ʼāfea ʼo te kokelekasio ʼa Ella, te pelesita ʼo te Komite Faka Felogoi Mo Te Lopitali, te ʼu tuʼuga tohi ki te ʼu tōketā ʼo ʼuhiga mo te ʼu faitoʼo ʼe mole fakaʼaogaʼi ai te toto.b Neʼe maui mālie te tafa ʼaē neʼe mole fakaʼaogaʼi ai te toto, pea kua lelei ia Ella ʼi te temi nei.—Gaue 15:28, 29.

Neʼe ōfo ʼaupito ia te gynécologue (te tōketā ʼe ina sivi te mahaki faka fafine) ʼa Ella, ia Karl, ko he Sutea neʼe tupu ʼi Siamani. Koia neʼe ina fakamanatuʼi age ko tana ʼu mātuʼa, ʼaē neʼe nā hāo mai te ʼu fai fakapō ʼa Itilele, neʼe nā feʼiloʼiʼaki mo te kau Fakamoʼoni ʼa Sehova ʼi te ʼu lotoʼā fakamamahi. Neʼe fai e Karl te ʼu tuʼuga fehuʼi. Logope tana maʼumaʼua ʼi tana gāue faka tōketā, kae neʼe maʼu e Karl tona temi ke fai tuʼumaʼu ai tana ako Tohi-Tapu. ʼI te taʼu ʼaē neʼe hoa mai kiai, neʼe kau ki te ʼu fono faka Kilisitiano ʼaē ʼe fai ʼi te vāhaʼa fuli.

Neʼe koteā te fua neʼe maʼu mai te pulapula ʼaē neʼe to e te tagata fai mata sioʼata? Neʼe kua tou vakaʼi te meʼa ʼaē neʼe hoko kia Sasha pea mo tona famili. ʼO feiā mo Ella, ko te pionie makehe. Ko tana taʼahine ko Eina, ʼaē neʼe hoki maʼu pe tona pepa mai te univelesitē, kua kau mo ia ki te gāue pionie. ʼO feiā mo Faina kua pionie makehe. Ki te tōketā ʼa Ella, ia Karl, kua papitema pea ʼe ko te tagata faifekau faka minisitelio, pea ʼe ina fakahā te mālohi mālōlō ʼo te moʼoni faka Tohi-Tapu ki te hahaʼi mahahaki ʼaē ʼe ʼōmai kia ia pea mo ʼihi atu.

Kua liliu te kiʼi kūtuga ʼaē ʼe palalau faka Lusia, ʼaē neʼe ʼi te kamataʼaga neʼe pipiki ki te kokelekasio lea faka Hepeleo ʼo Haïfa, ko he kokelekasio lea faka Lusia ʼe faiga mālohi, mo ʼona kau fai faka mafola e 120 tupu. Neʼe hoko te tuputupu ʼaia, ʼuhi ko te fakaʼaogaʼi e te tagata fai mata sioʼata ʼi Lviv te faigamālie moʼo to te pulapula!

[Kiʼi nota]

[Paki ʼo te pasina 29]

(Vakaʼi te nusipepa)

UKRAINE

ISRAËL

[Haʼuʼaga ʼo te paki]

Mountain High Maps® Copyright © 1997 Digital Wisdom, Inc.

[Paki ʼo te pasina 30]

Ko Ella mo tana taʼahine, ko Eina

[Paki ʼo te pasina 31]

Ko te kiʼi kūtuga fiafia ʼo te kau Fakamoʼoni ʼa Sehova ʼe palalau faka Lusia ʼi Haïfa. Mai te faʼahi hema ki te faʼahi mataʼu: Ko Sasha, mo Ilana, mo Natasha, mo Galina, mo Faina, mo Ella, mo Eina, pea mo Karl