Te ʼu Fehuʼi ʼa Te Kau Lautohi
Mai tona ʼaluʼaga ʼaē ʼe lotolelei e Sehova ke ina fakamolemole te ʼu agahala ʼaki te sakilifisio faitotogi, he koʼe koa ʼe tonu ke fakahā e te kau Kilisitiano tanatou agahala ki te kau tagata ʼāfea ʼo te kokelekasio?
ʼI te meʼa ʼaē neʼe hoko kia Tavite pea mo Pati-Sepa, ʼe tou sio ai neʼe fakamolemole e Sehova te agahala ʼo Tavite, logola neʼe ko he agahala mamafa, he neʼe fakahemala moʼoni ia Tavite. ʼI te ʼalu age ʼa te polofeta ko Natane, neʼe tala fakalelei age e Tavite: “Kua ʼau agahala kia Sehova.”—2 Samuele 12:13.
Kae ʼe mole tali pe e Sehova te fakahemala moʼoni ʼa te tagata agahala pea mo ina fakamolemole kia ia, kae ʼe ina toe fai mo he ʼu fakatuʼutuʼu moʼo tokoni kia ia ʼaē neʼe hala ke toe lelei ʼi te faʼahi fakalaumālie. ʼI te faʼahi ʼo Tavite, neʼe tokoni kia ia te polofeta ko Natane. Ia ʼaho nei, ʼi te kokelekasio faka Kilisitiano, ʼe ʼi ai te ʼu tagata kua fakapotopoto ʼi te faʼahi fakalaumālie, te kau tagata ʼāfea. ʼE fakamahino fēnei e te tisipulo ko Sakopo: “ ʼE mahaki koa he tahi ia koutou [ʼi te faʼahi fakalaumālie]? Ke ina pāui ki ʼona tafa te ʼu tagata ʼāfea ʼo te kokelekasio, pea ke nātou faikole ʼo ʼuhiga mo ia, ʼo tākaiʼaki te lolo ʼaki te huafa ʼo Sehova. Pea ko te faikole ʼo te tui ʼe ina faitoʼo anai ia ia ʼaē ʼe mamahi, pea ʼe fakatuʼu anai ia e Sehova. Koia ʼaē, kapau neʼe agahala, pea ʼe fakamolemole anai ki ai.”—Sakopo 5:14, 15, MN.
ʼE lahi te ʼu meʼa ʼe feala ke fai e te kau tagata ʼāfea aga fakapotopoto moʼo fakasiʼisiʼi te lotomamahi ʼo te tagata agahala ʼaē ʼe fakahemala. ʼE nātou faiga ke nātou faʼifaʼitakiʼi ia Sehova ʼi tanatou ʼu felogoi mo ia. ʼE mole nātou fia aga fefeka anai, tatau aipe peʼe tonu ke nātou fakatonutonuʼi mālohi ia ia ʼaē neʼe agahala. ʼAki he lotomahino, ʼe nātou tokagaʼi te ʼu meʼa tāfito ʼaē ʼe ʼaoga kia ia. ʼAki he faʼa kātaki, ʼe nātou faiga ke fetogi te manatu ʼo ia ʼaē neʼe agahala, ʼo nātou fakaʼaogaʼi te Folafola ʼa te ʼAtua. (Kalate 6:1) Kapau la ʼe ko he tahi ʼe mole ina fia fakahā fakahagatonu tana agahala, kae ʼi tana ʼalu ki te kau tagata ʼāfea, ʼe lagi uga ai ia ia ke fakahemala, ohage ko Tavite ʼi te temi ʼaē neʼe ʼalu age ia Natane kia ia. Ko te tokoni ʼaē ʼe foaki e te kau tagata ʼāfea, ʼe tokoni kia ia ʼaē neʼe agahala ke ʼaua naʼa ina toe fai te agahala ʼaia, pea ke ʼaua naʼa hoko kia ia te ʼu fua kovi heʼe kua liliu ko he tahi ʼe ina fai tuʼumaʼu te agahala ʼaia.—Hepeleo 10:26-31.
ʼE mahino ia ʼe mole faigafua ki he tahi ke ina fakahā ki ʼihi te ʼu aga ʼaē ʼe ufiufi ai pea mo kole ke fakamolemole tana aga ʼaia. ʼE tonu ke mālohi ia ia ʼaē neʼe agahala. Kae koutou fakakaukauʼi te tokoni ʼaia. Neʼe ʼui fēnei e te tagata neʼe mole ina fakahā ki te kau tagata ʼāfea tana agahala mamafa: “Neʼe ʼau logoʼi toku lotomamahi, neʼe mole puli ʼi he temi. Neʼe ʼau hikihiki taku gāue fai faka mafola, kae neʼe mole fīmālie toku loto.” Kia ia, neʼe feʼauga pe tana fakahā ki te ʼAtua ʼi te faikole tana agahala, kae neʼe hā lelei neʼe mole feʼauga, he neʼe ina logoʼi te ʼu meʼa ʼaē neʼe logoʼi e te Hau ko Tavite. (Pesalemo 51:8, 11) ʼE lelei age te tali ia te tokoni ʼofa ʼaē ʼe foaki e Sehova ʼaki te ʼu tagata ʼāfea.