Neʼe Ina ‘Kātakiʼi ʼo Kaku Ki Te Fakaʼosi’

ʼI TE foʼi fime neʼe fakahā ʼi te 1993 ki te kau hū foʼou ki te ʼu pilō takitaki ʼa te kau Fakamoʼoni ʼa Sehova, neʼe fakahā e Lyman Alexander Swingle tana ʼu manatu ʼo ʼuhiga mo te tauhi kia Sehova: “Ke ke mate mo ʼou sūlie!”a

Ko te Tēhina ko Swingle ʼaē neʼe kua taʼu hivagofulu, neʼe ina fai te ʼu palalau ʼaia moʼo fakaloto mālohiʼi niʼihi ke nātou fai feiā. Neʼe ina ‘kātakiʼi ʼo kaku ki te fakaʼosi.’ (Mateo 24:13) Logope tana logo kovi, kae ʼi te Feliafā, ʼaho 7 ʼo Malesio neʼe kau ki te fono ʼa te Kolesi Pule ʼa te kau Fakamoʼoni ʼa Sehova, he neʼe kau ki te kau faʼufaʼu. ʼI te Feliatolu ʼo te vāhaʼa ʼaē neʼe hoa kiai, neʼe ʼāsili kovi tana mahaki pea ʼi te māfoatā, ʼi te hola 4 ʼosi 26, ʼi te ʼaho 14 ʼo Malesio, neʼe tala e te tōketā kua mate.

Neʼe kamata te gāue ʼa Lyman Swingle ʼi te ʼu pilō takitaki ʼa te kau Fakamoʼoni ʼa Sehova ʼi Brooklyn, ʼi New York, ʼi te ʼaho 5 ʼo ʼApelili 1930. Neʼe teitei gāue ai ia taʼu e 71. Neʼe ʼuluaki gāue ʼi te fakapipiki ʼo te ʼu tohi, pea ʼosi ʼaia pea gāue ʼi te fale tā tohi pea neʼe tokoni ki te faʼu ʼo te pena ʼaē ʼe fakaʼaogaʼi moʼo tā ʼaki te ʼu tohi. ʼI tona fakahagatonu, neʼe gāue te Tēhina ko Swingle ʼi te fale faʼu pena lolotoga taʼu 25, kae neʼe toe kau foki ʼi te kau gāue ʼo te faitohi lolotoga taʼu e 20. Ki tona ʼu taʼu fakaʼosi e 17, neʼe gāue ʼi te pilō ʼo te Trésorerie.

Ko te Tēhina ko Lyman neʼe ko te tagata lototoʼa ʼi te fai faka mafola ʼo te Puleʼaga ʼo te ʼAtua. ʼI tana ʼu ʼuluaki taʼu ʼi Brooklyn, ko ia mo te tēhina ʼaē neʼe nā kogafale tahi, ia Arthur Worsley, neʼe nā feʼoloʼaki ʼi te Vaitafe ʼo Hudson, ʼi te vaka ʼa te Fakamoʼoni. Neʼe lahi te ʼu fakaʼosi vāhaʼa neʼe nā fakaʼaogaʼi ai te meʼa fakatagi moʼo tala te logo lelei ʼo te Puleʼaga ki te hahaʼi ʼaē ʼe nonofo ʼi te ʼu kauvai ʼo te vaitafe.

Neʼe tupu te Tēhina ko Swingle ʼi te ʼaho 6 ʼo Novepeli 1910, ʼi Lincoln, ʼi Nebraska, kae mole faʼa fualoa kiai pea neʼe hiki nofoʼaga te famili ki te kolo ʼo Salt Lake, ʼi Utah. ʼI te kolo ʼaia, ʼi te 1913, neʼe liliu tana ʼu mātuʼa ko te ʼu Ako ʼo te Tohi-Tapu, te higoa ʼāfea ʼa te kau Fakamoʼoni ʼa Sehova. Lolotoga ni ʼu taʼu, neʼe tali kāiga te famili Swingle ki te kau tagata fai akonaki neʼe ʼōmai mai te ʼu pilō takitaki ʼa te kau Fakamoʼoni, pea neʼe malave te gāue ʼa nātou ʼaia kia Lyman. ʼI te 1923, ʼi tona taʼu 12, neʼe papitema moʼo fakahā ai kua foaki tona maʼuli ki te ʼAtua.

ʼI tana ʼosi gāue selipatea lolotoga taʼu e 26 ʼi Brooklyn, neʼe koloaʼia leva te maʼuli ʼo Lyman ʼi tana ʼohoana mo Crystal Zircher ʼi te ʼaho 8 ʼo Sūnio 1956. Neʼe nā fakatahi tuʼumaʼu, ʼo nā gāue fakatahi ʼi te minisitelio ʼo aʼu ki te mate ʼa Crystal ʼi te 1998. ʼI te ʼu taʼu e tolu ʼi muʼa atu, neʼe hoko te mahaki kia Crystal ko te apoplexie, pea neʼe liliu ai ʼo māʼimoa. Ko te tokaga ʼa Lyman kia ia ʼi te ʼaho fuli neʼe ko te faʼifaʼitaki ki te hahaʼi ʼo ʼuhiga mo te loto tokaga, kae tāfito kia nātou ʼaē neʼe nātou sio age kia Lyman ʼe ina toho te hekaʼaga ʼi te vaʼe ala ʼo te ʼu vāhaʼa fale, kae tufa e Crystal Te Tule Leʼo pea mo te Réveillez-vous ! ki te hahaʼi.

Ko te Tēhina ko Swingle neʼe ko te tagata lotomāfana pea mo aga fakahagatonu, pea neʼe ʼofainaʼi e te hahaʼi ʼaē neʼe nātou feʼiloʼiʼaki mo ia. Ohage ko tana tāmai pea mo tana faʼe, neʼe ina maʼu te ʼamanaki ʼaē ʼe fakatafito ki te Tohi-Tapu ʼaē ko te maʼuli tahi mo Sesu Kilisito ʼi te Puleʼaga ʼi selo, ko he ʼamanaki ʼe tou tui papau kua ina ʼosi maʼu ʼi te temi nei.—1 Tesalonika 4:15-18; Apokalipesi 14:13.

[Kiʼi nota]

[Paki ʼo te pasina 31]

Neʼe gāue te Tēhina ko Swingle lolotoga taʼu e 25 ʼi te fale faʼu pena

[Paki ʼo te pasina 31]

Neʼe nonofo fakatahi tuʼumaʼu ia Lyman mo Crystal