Kua Liliu Te ʼu Lupo Ko Te ʼu Ōvi!

ʼI tamā kei liliki mo Sakina, neʼe ma vāhaʼa fale. Ko Sakina neʼe foʼi sino pea mo mālohi, kae ko ʼau neʼe ʼau veliveli pea mo sino kovi. Neʼe ma tau kē, pea ʼi te tahi ʼaho neʼe ma fuhu. Talu mai te ʼaho ʼaia, neʼe mole kei ma fegūʼaki pea mo feʼalofaʼaki. Ki muli age, neʼe mole kei ma kolo tahi, ʼo mole ma toe fesioʼaki ai.

ʼI te 1994, neʼe ʼau kamata ako te Tohi-Tapu mo te kau Fakamoʼoni ʼa Sehova, pea ʼaki te temi neʼe fetogi toku ʼulugaaga. Hili taʼu e fā, neʼe ʼau kau ki tamatou fakatahi makehe ʼaho e tahi ʼi Bujumbura, ʼi Burundi, pea neʼe ʼau punamaʼuli ʼi taku felāveʼi ai mo Sakina. Neʼe ʼau fiafia ʼi tana kau ki te fakatahi ʼaia, kae neʼe mole ma fakahā tamā fiafia ʼi tamā feʼalofaʼaki. Ki muli age ʼi te ʼaho pe ʼaia, neʼe ʼau punamaʼuli ʼaupito ʼi taku sio neʼe kau ia nātou ʼaē neʼe papitema! Neʼe ina fai mo ia te ʼu fetogi lahi. Neʼe mole ko te taʼahine ʼaē neʼe fia fuhu pea mo fakatupu kē tuʼumaʼu. Neʼe ʼau fiafia lahi ʼi taku sio ki tana fakahā ia muʼa ʼo te hahaʼi kua ina foaki tona maʼuli ki te ʼAtua ʼo papitema!

ʼI tana hake mai te vai, neʼe ʼau fāʼufua kia ia pea mo fanafana ki tona taliga: “ ʼE kei ke manatuʼi tatā fuhu?” Neʼe ina tali fēnei: “Ei, kei ʼau manatuʼi, kae kua ʼosi te ʼu meʼa ʼaia. Kua ʼau fetogi ʼi te temi nei.”

Kua ma fiafia toko lua ʼi tamā maʼu te moʼoni ʼo te Tohi-Tapu ʼaē ʼe ina fakalogo tahi te hahaʼi pea mo ina fetogi tomā ʼu ʼuhiga lupo ʼo ma liliu ko he ʼu ōvi ʼa te Tagata Tauhi Ōvi Lahi, ko Sehova ʼAtua. Ei, ko te moʼoni ʼo te Tohi-Tapu ʼe ina fetogi te ʼu maʼuli.