Tou Fakafetaʼi Pea Mo Fiafia

NEʼE ʼui fēnei e te nusipepa ʼo Kanata, te Calgary Herald: “Ko te loto fakafetaʼi ʼe ko he potu maʼuhiga ia ʼi te maʼuli ʼo te tagata.” Neʼe talanoa te nusipepa ʼaia ki te fehuʼi neʼe fai e te tagata faiako ki tana kau ako taʼu hiva ʼo te ʼu faleako liliki, ke nātou tohi te ʼu meʼa fuli ʼaē ʼe nātou fakafetaʼi kiai. Neʼe ʼui e te kiʼi tama neʼe fakafetaʼi ki tona famili ‘koteʼuhi neʼe nātou taupau fakalelei ia ia.’ ʼO toe feiā pe mo te kiʼi finemui neʼe fakafetaʼi ki tona famili, neʼe ina ʼui fēnei: “ ʼE nātou puipui ia ʼau, mo tokakaga kia ʼau, mo ʼofa kia ʼau, mo fafaga ʼau, pea kanaʼauala taku ʼu mātuʼa, ʼe mole ʼau ʼi te kele nei.”

ʼE mole maʼu he fīmālie ʼi te mole loto fakafetaʼi. ʼE ʼui e te tagata fai filosofia pea mo fai teolosia ko J. I. Packer, “neʼe fakatupu tatou ke tou maʼuli ʼo fakalogo ki te ʼAtua pea mo tou fefakalogoʼaki.” Ko te faʼahi ʼaia ʼe ina fakamanatuʼi mai kia tatou te tokoni poto ʼa te Tohi-Tapu neʼe fai kua hili kiai te ʼu sēkulō, ʼe ina ʼui fēnei: “Koutou fakahā tokotou loto fakafetaʼi.” (Kolose 3:15, MN ) ʼE kita taupau he ʼu felogoi lelei, mo kapau ʼe kita fai he ʼu fakamālo pea mo he fakafetaʼi ki te hahaʼi.

Pea tahi ʼaē meʼa, ʼaki tatatou maʼuli fakafetaʼi pea mo feʼofaʼofani, ʼe tou toe fakahā ai he loto fakafetaʼi kia Sehova, pea ʼe ina tokagaʼi te faʼahi ʼaia. ʼE ʼui fēnei e te Tohi-Tapu: “Ko te ʼu mata [ʼo Sehova] ʼe taka ʼi te kele katoa, ke ina fakahā tona mālohi kia nātou ʼaē ʼe katoa tonatou loto kia te ia.” (2 Fakamatala 16:9) ʼE fakapapau mai e te ʼAtua ʼe ina manatuʼi pea mo leleiʼia te ʼofa ʼaē ʼe fakahā e te hahaʼi ki tona huafa. (Hepeleo 6:10) Ei, ʼe ʼi ai te tupuʼaga mālohi ʼo tatatou fakafetaʼi, koteʼuhi ko te kalitate fakaʼatua ʼaia, mokā ʼe fakahā ʼi te ʼaho fuli, pea ʼe ina fakafiafia ia Sehova pea ina fakatuputupu ai totatou fiafia. ʼE hage ko tona ʼui e Tāʼaga Lea 15:13: “Ko he loto fiafia ʼe lave lelei ki te fofoga.”