“Tokaga, Heʼe Mamahi”
NEʼE kua koutou logo koa ki te ʼu taʼi palalau ʼaia? Neʼe lagi ʼui atu e he tōketā peʼe ko he afilimie ʼi muʼa ʼo hana fakahoko he faitoʼo.
ʼE mahino ia neʼe mole koutou fakafisi ki he faitoʼo ʼuhi heʼe mamahi. Kae neʼe koutou tali te mamahi koteʼuhi neʼe koutou ʼiloʼi ʼe fua lelei anai kia koutou. ʼI ʼihi ʼaluʼaga, ko te tali peʼe ko te fakafisi ki he faitoʼo ʼe logo kovi, ʼe feala ke kita maʼuli ai peʼe kita mate ai.
Kapau ʼe lagi mole maʼua ke tokaga tuʼumaʼu he tōketā kia tatou, kae ʼe ʼaoga kia tatou fuli ʼi totatou ʼuhiga tagata agahala ke akonakiʼi tuʼumaʼu tatou, peʼe fakatonutonuʼi tatou, tatau aipe peʼe lagi tou mamahi ai ʼi ʼihi lakaga. (Selemia 10:23) Moʼo faka maʼuhigaʼi te ʼaoga ʼo te potu ʼaia ki te fānau, ʼe ʼui fēnei e te Tohi-Tapu: “ ʼE nonoʼo te agavale ʼi te loto ʼo te tama; kae ko te kauʼi ʼakau ʼo te akonaki ʼaē ka ina fakamamaʼo anai ia te ia.”—Tāʼaga Lea 22:15.
ʼI te vaega ʼaenī, ko te kauʼi ʼakau ʼe ina fakatātā te pule ʼa te ʼu mātuʼa. ʼE moʼoni ʼe tokosiʼi te fānau ʼe nātou leleiʼia te akonaki. ʼE lagi nātou ʼiʼita, mo kapau ʼe fai ʼaki he faʼahiga tūʼa. Kae ko te ʼu mātuʼa popoto pea mo ʼofa, ʼe mole nātou sioʼi te fakaloto mamahi ʼa te akonaki ʼaia ki tanatou tamasiʼi, kae ʼe nātou sioʼi tona fua lelei ki muli age. ʼE ʼiloʼi e te ʼu mātuʼa Kilisitiano te moʼoni ʼo te ʼu palalau ʼaenī ʼa te Folafola ʼa te ʼAtua: “ ʼI te moʼi temi pe ʼaia ko te akonaki fuli pe ʼe hage ia ʼe mole ko he meʼa fakafiafia, kae ko he meʼa fakaloto mamahi; kae ki muli age ʼe ina foaki kia nātou ʼaē neʼe ina akoʼi ia te fua ʼo te tokalelei, ʼaē ko te faitotonu.”—Hepeleo 12:11, MN; Tāʼaga Lea 13:24.
ʼE moʼoni, ʼe mole ko te fānau pe ʼaē ʼe ʼaoga ki ai he akonaki. ʼE toe ʼaoga pe foki te potu ʼaia ki te hahaʼi lalahi. ʼE fai te ʼu palalau faka Tohi-Tapu ʼaenī ki te hahaʼi lalahi: “Puke te akonaki; ʼaua naʼa ke tuku age. Hāofaki maʼu, heʼe ko tou maʼuli ʼaia.’ ” (Tāʼaga Lea 4:13) Ei, ko te hahaʼi popoto—tūpulaga pea mo matuʼa—ʼe nātou tali anai te akonaki ʼaē ʼe fakatafito ki te Folafola ʼa te ʼAtua, te Tohi-Tapu, koteʼuhi ko te faʼahi ʼaia ʼe ina fakatologa tonatou maʼuli.