ʼE Mole ʼi Ai He Taʼu Ki Te Ako
KO KSENIYA neʼe tupu ʼi te taʼu 1897. ʼE ʼi ai tana ʼu taʼahine e toko 3, mo tana tama e tahi, mo tona ʼu mokopuna e 15, pea mo te ʼu mokoliha e 25. Ko te meʼa neʼe akoʼi age e tana ʼu mātuʼa neʼe ina fai ʼi tona maʼuli katoa. Logope neʼe haʼu ki Moscou koteʼuhi neʼe hola mai te lepupilika ʼo Abkhazie ʼaē ʼe hoko ai te tau, kae neʼe ina leleiʼia tona faʼahiga maʼuli, tāfito te lotu ʼaē neʼe akoʼi age e tana ʼu mātuʼa.
ʼI te taʼu 1993, neʼe liliu te taʼahine ʼa Kseniya, ko Meri ko te Fakamoʼoni ʼa Sehova. Neʼe kamata palalau ia Meri kia Kseniya ʼo ʼuhiga mo Sehova ʼAtua pea mo te Tohi-Tapu, kae neʼe mole fia logo kiai. Neʼe ina tau ʼui pe ki tana taʼahine, “Kua ʼau finematuʼa fau ke ʼau ako he meʼa foʼou.”
Kae ko tana taʼahine ko Meri, mo te ʼohoana ʼo tona mokopuna tagata, pea mo tana ʼu mokoliha fafine ko Nana mo Zaza, ʼaē neʼe kua nātou liliu fuli ko te kau Fakamoʼoni ʼa Sehova, neʼe nātou haga palalau age ki ai ʼo ʼuhiga mo te Tohi-Tapu. ʼI te tahi afiafi ʼo te taʼu 1999, neʼe nātou lau age kia Kseniya ia te vaega neʼe malave ki tona loto. Neʼe ko te ʼu palalau neʼe fai e Sesu ki tana kau ʼapositolo agatonu ʼi te temi ʼaē neʼe ina fakatuʼu te Taumafa ʼo Te ʼAliki. (Luka 22:19, 20) ʼI te afiafi ʼaia, ʼi tona taʼu 102, neʼe fakatotonu e Kseniya ke ina ako te Tohi-Tapu.
ʼE ʼui fēnei e Kseniya: “ ʼI te hili ʼo te ʼu taʼu 102 ʼo toku maʼuli, ko taku hoki ʼiloʼi ʼaē te ʼuhiga ʼo te maʼuli. Kua mahino leva kia ʼau ʼe mole ʼi ai he tahi age meʼa fakatalakitupua ʼi takita tauhi ki totatou ʼAtua ʼofa, ko Sehova. ʼE kei ʼau mālohi pea mo haohaoa. ʼE mole ʼau fakaʼaogaʼi he ʼu mata sioʼata ki te lautohi pea ʼe ʼau fakatahi tuʼumaʼu mo toku famili.”
ʼI te ʼaho 5 ʼo Novepeli 2000, neʼe papitema ia Kseniya. ʼE ina ʼui fēnei: “ ʼI te temi nei ʼe ʼau foaki toku maʼuli kia Sehova moʼo tauhi kia te ia ʼaki te ʼofa. ʼE ʼau tufa te ʼu kaupepa pea mo te ʼu pepa lotu kia nātou ʼaē ʼe nātou fakatalitali ʼi te taliʼaga kā ʼaē ʼe ōvi age ki toku ʼapi. ʼE tautau ʼōmai toku ʼu kāiga ʼo ʼaʼahi ia ʼau, pea ʼe ʼau palalau fakafiafia age kia nātou ki te moʼoni ʼo ʼuhiga mo Sehova.”
Kua fakaʼamu ia Kseniya ki te ʼaho ʼaē ka ‘liliu ai tona kakano ʼo foʼou ake ʼi tana kei finemui, ke toe liliu ki te ʼu ʼaho ʼo tona mālohi faka tūpulaga.’ (Sopo 33:25) Kapau ki he tahi kua taʼu teau ʼe mole heʼeki matuʼa fau ke ina ako ʼi te Tohi-Tapu te ʼuhiga ʼo te maʼuli, pea e feafeaʼi la koutou?