‘Koutou Fefakamolemoleʼaki ʼAki He Lotolelei’
ʼE KOUTOU manatu koa la kua fakamolemole takotou ʼu agahala e te ʼAtua? ʼI Amelika, tokolahi te hahaʼi lalahi ʼe nātou manatu feiā. ʼE fakamatala e te tōketā ko Loren Toussaint, ʼaē neʼe ina takitaki te kumi ʼi te univelesitē ʼo Michigan ki te ʼu kumi faka sosiale, ʼe teitei pe ko te toko 80 ʼi te teau ʼi te hahaʼi lalahi ʼe laka ʼi te taʼu 45 ʼe nātou ʼui kua fakamolemole tanatou ʼu agahala e te ʼAtua.
Kae ko te faʼahi ʼe maʼuhiga ke tokagaʼi, ʼe gata pe ki te toko 57 ʼi te teau ia nātou ʼaia neʼe nātou fakamolemole ki ʼihi hahaʼi. Ko te sivi ʼaia ʼe ina fakamanatuʼi mai kia tatou ia te ʼu palalau ʼaenī neʼe fai e Sesu ʼi tana Akonaki ʼi te Moʼuga: “Kapau ʼe koutou fakamolemole ki te hahaʼi ʼanatou hala, pea ʼe toe fakamolemole anai mo takotou Tāmai kia koutou; kaʼe kapau ʼe mole koutou fakamolemole ki te hahaʼi ʼanatou hala, pea ʼe mole fakamolemole anai e takotou Tāmai kia koutou takotou ʼu hala.” (Mateo 6:14, 15, MN ) Ei, ʼe fakalogo te fakamolemole ʼo tatatou hala e te ʼAtua ki tatatou fakamolemole ki ʼihi.
Neʼe fakamanatuʼi e te ʼapositolo ko Paulo ia te pelesepeto ʼaia ki te kau Kilisitiano ʼo Kolose. Neʼe ina tokoniʼi fēnei nātou: “Koutou haga fekātakiʼaki pea mo fefakamolemoleʼaki ʼaki he lotolelei, mo kapau ʼe ʼi ai he tahi ʼe ina koviʼia he meʼa ʼa he tahi age. Ohage ko te lotolelei ʼa Sehova ke ina fakamolemole kia koutou, ke koutou toe fai feiā pe mo koutou.” (Kolose 3:13, MN ) ʼE moʼoni ʼe mole faigafua tuʼumaʼu ia te fai ʼo te meʼa ʼaia. Ohage foki la, ka fai atu e he tahi he ʼu palalau neʼe mole fakakaukauʼi peʼe ko he ʼu palalau kona, ʼe feala pe ke faigataʼa te fakamolemole kia ia ʼaē neʼe ina fai te ʼu palalau ʼaia.
Kae ʼe lahi te ʼu lelei ʼe maʼu mai te fakamolemole ki te hahaʼi. Ko te tōketā ko David R. Williams, ʼaē ʼe ina sivisivi te agaaga ʼo te hahaʼi, neʼe ina ʼui fēnei ʼo ʼuhiga mo te ʼu meʼa neʼe ina maʼu ʼi tana ʼu kumi: “Neʼe mātou tokagaʼi te pikipikiga ʼo te loto fakamolemole ki ʼihi mo te fakakaukau ʼo te kau Amelika ʼaē kua fotufotuʼa pea mo nātou ʼaē kua matutuʼa.” ʼE ʼalutahi te faʼahi ʼaia mo te ʼu palalau ʼaenī neʼe tohi e te Hau poto ko Salomone kua hili kiai taʼu e 3 000: “Ko he loto ʼe tokatoka ʼe ko te maʼuli ia ʼo te kakano.” (Tāʼaga Lea 14:30) Mai te ʼaluʼaga ʼaē ko te loto fakamolemole ʼe ina uga he ʼu felogoi lelei mo te ʼAtua pea mo totatou ʼu kāiga, koia ʼe lēsili ai hatatou fia fefakamolemoleʼaki ʼaki te loto katoa.—Mateo 18:35.