ʼE ʼAoga Kia Tatou Fuli Ia Te Fakavikiviki
NEʼE ko te ʼaho fakafiafia maʼa te kiʼi taʼahine. Logope neʼe tau kinisi ia ia ʼuhi ko tana pago, kae ʼi te ʼaho leva ʼaia, neʼe nofo maʼu. Kae ʼi te pōʼuli ʼaia, ʼi tona ʼosi fakamoe, neʼe logoʼi e tana faʼe ʼe tagi tana kiʼi taʼahine. ʼI te fehuʼi age te tupuʼaga ʼo tana feiā, neʼe hovini mo ʼui fēnei: “Neʼe mole ʼau agalelei ʼi te ʼaho nei?”
Neʼe hage te fehuʼi ʼaia ko he hukiʼi ʼo te loto ʼo te faʼe. Tuʼumaʼu pe neʼe vave ki te kinisi ʼo tana kiʼi taʼahine. Kae ʼi te ʼaho ʼaia, logola tana tokagaʼi te faiga ʼa tana kiʼi taʼahine ke nofo fakalelei, neʼe mole pe la fai e tana faʼe he palalau fakavikiviki e tahi.
ʼE mole ko te ʼu kiʼi taʼahine veliveli pe ʼaē ʼe ʼaoga kia nātou he fakavikiviki pea mo he fakaloto mālohi. ʼE ʼaoga kia tatou fuli—ʼo feiā pe mo te ʼu tokoni pea mo te fakatonutonuʼi.
Koteā ʼaē ʼe koutou logoʼi mokā ʼe fai atu he fakavikiviki fakamalotoloto? ʼE mole koa la malave ia koutou pea mo fakafiafia kia koutou? ʼE hage pe ko te ʼu meʼa ʼe tou logoʼi mokā tokaga he tahi kia tatou. ʼE ko he meʼa fakaloto mālohi kia tatou hatatou ʼiloʼi, ko te meʼa ʼaē ʼe tou fai ʼe ʼi ai tona ʼuhiga, pea ʼe ina uga ai tatou ke tou toe gāue mālohi ki he tahi temi. Koia, ka fai mai he fakavikiviki fakamalotoloto, ʼi te agamāhani ʼe ina uga tatou ke tou fakaōvi kia ia ʼaē neʼe ina toʼo he temi moʼo fai he fakaloto mālohi.—Tāʼaga Lea 15:23.
Neʼe mahino kia Sesu ʼe ʼaoga ke fai he fakavikiviki. ʼI te lea fakatātā ʼo ʼuhiga mo te ʼu taleta, ko te pule (ʼaē ʼe ina fakatātā ia Sesu totonu) ʼe ina fakavikiviki te ʼu tagata kaugana agatonu e lua ʼo ina ʼui fēnei age kia nāua takitokotahi: “ ʼE lelei, tagata kaugana agalelei pea mo agatonu!” Neʼe ko he ʼu palalau fakaloto māfana! Tatau aipe pe neʼe kehekehe tonā ʼu fealagia pea mo te ʼu meʼa ʼaē neʼe nā fakahoko, kae neʼe tatau te fakavikiviki ʼaē neʼe fai age kia nāua.—Mateo 25:19-23, MN.
Koia tou manatuʼi te faʼe ʼa te kiʼi taʼahine ʼaia. ʼE mole tou atali ke tagi he tahi pea hoki tou fakavikiviki kia ia. Kae ʼe tou lava kumikumi he ʼu faigamālie ke tou fai ai te faʼahi ʼaia. ʼE mahino ia ʼe tou ʼiloʼi lelei te tupuʼaga ʼo te fai ʼo he fakavikiviki fakamalotoloto ʼi te ʼu faigamālie fuli pe.