Ko He ʼu Faiga Ke Maʼuliʼi Te ʼu Aga Lelei ʼAē ʼe Tonu Ke Fai
ʼI te fakaʼosiʼosi ʼo te taʼu 2001, ko nātou ʼaē neʼe nātou fakalogo ki te tala logo ʼi te Lātio ʼo Mozambique neʼe nātou logoʼi te tala ʼaenī:
“Neʼe ʼaʼahi e te pelesita ʼo te Lepupilika ia te ʼu pilō ʼa te kau Fakamoʼoni ʼa Sehova ʼi Maputo. Neʼe ina fakaloto mālohiʼi te kokelekasio faka lotu ʼaia ke nātou haga faiga ʼi tanatou uga te hahaʼi ke nātou maʼuliʼi te ʼu aga lelei ʼaē ʼe tonu ke fai ʼi te ʼu famili pea mo akoʼi te hahaʼi lalahi ʼaki te ʼu polokalama ako lautohi pea mo te ako faitohi. ʼE lau ko te toko 10 000 hahaʼi kua nātou sio ki te ʼu fua lelei ʼo te ʼu polokalama ako ʼaia. Maʼa te Pelesita ko Chissano, ʼe tonu ia ke vikiʼi te ʼu polokalama ʼaia, ʼi tanatou tokoni maʼuhiga ki te kaugamālie, ʼi te fai puleʼaki ki te ʼu fihifihia ako ʼe kei tau mo te fenua.”
Koʼeni te koga ʼo te palalau ʼa te pelesita neʼe fakahā e te tala logo: “ ʼE ko he meʼa fakaloto mālohi ʼaupito hatatou sisio ki he hahaʼi tokolahi ʼe fia fai ki te lautohi mo te faitohi. ʼE fakahā mai ai ʼe ʼi ai te ʼu hahaʼi ʼe nātou tokoni mai anai kia tatou ki te fakasiʼisiʼi ʼo te hahaʼi ʼe mole poto lautohi peʼe faitohi. Koia ʼe ʼau fia fakaloto mālohiʼi te kau Fakamoʼoni ʼa Sehova ke nātou kātaki ʼi tanatou ʼu polokalama ako lautohi pea mo faitohi, ʼo mole nātou lauʼia te lea. Ko te meʼa ʼaē ʼe maʼuhiga tāfito ʼe ko te feala ʼo he felogoi gafua pea mo feala ai ki te temi ka haʼu ke lahi age he kau ki te ako.”
ʼE fai nei e te kau Fakamoʼoni ʼa Sehova ʼi Mozambique ia te ʼu kalasi ʼe akoako ai te lautohi mo te faitohi ʼi te ʼu koga meʼa e 850 ʼi te fenua katoa koteʼuhi ke feala ai ki te hahaʼi ke nātou lau ia te Folafola ʼa te ʼAtua. Pea tahi ʼaē meʼa, ʼe nātou fai noa ia te ʼu ako faka Tohi-Tapu e 50 000 ʼi te vāhaʼa fuli. Ko te ʼu faʼahi ʼaenī ʼe ko he koga ia ʼo te polokalama ako Tohi-Tapu ʼe fai ʼi te malamanei katoa ʼi te ʼu fenua e 235. (Mateo 24:14) ʼE feala pe foki ke ʼaoga atu kia koutou ia te polokalama ʼaia. Koutou faigaʼi ke koutou felāveʼi mo te kau Fakamoʼoni ʼa Sehova ʼo tokotou nofoʼaga.