Ko He Tokoni Moʼoni Ki Te Kau Māsisiva
ʼI TE temi ʼaē neʼe kei maʼuli ai ia Sesu Kilisito, te ʼAlo ʼo te ʼAtua ʼi te kele, neʼe ina fakahā tana fia tokoni moʼoni ki te kau māsisiva. ʼO ʼuhiga mo te minisitelio ʼo Sesu, neʼe ʼui fēnei e te tahi neʼe sio mata ki te ʼu meʼa ʼaē neʼe ina fai: “Kua sio te kivi, pea kua haele te vae ketu, kua maʼa te kilia, pea kua logo te tuli, kua tuuake te mate, pea mo te evaselio kua fagonogono ki te hahai masiva.” (Mateo 11:5) Kae feafeaʼi ki te ʼu lauʼi miliona hahaʼi māsisiva ia ʼaho nei? ʼE ʼi ai koa he logo lelei maʼa nātou? Ei, ko te logo ʼo ʼuhiga mo he ʼamanaki.
Logola ko te hahaʼi māsisiva ʼe mole tokagaʼi nātou pea mo galoʼi nātou e te malamanei, kae ʼe fakapapau fēnei ia te Folafola ʼa te ʼAtua, te Tohi-Tapu: “Ko te tagata masiva ʼe mole galoʼi tuʼumaʼu anai, pea mo te ʼamanaki ʼa te kau agavaivai ʼe mole puli anai ʼi he temi.” (Pesalemo 9:18) Ko te ʼu palalau fakaloto fīmālie ʼaia ʼe hoko anai mokā fetogi anai te ʼu puleʼaga fakatagata fuli pe, e te Puleʼaga ʼa te ʼAtua, ʼaē ko he puleʼaga moʼoni ʼi selo. (Taniela 2:44) ʼI tona ʼuhiga Hau ʼo te puleʼaga ʼaia ʼi selo, ko Sesu “ ʼe fakaʼofaʼofa anai kia ia ʼaē ʼe veliveli pea mo ʼaē ʼe masiva, pea ʼe ina hāofaki anai te ʼu nefesi ʼo te kau masiva. Mai te taʼomia pea mo te agamālohi ʼe ina totogi anai tonatou ʼu nefesi, pea ʼe maʼuhiga anai kia ia tonatou toto.”—Pesalemo 72:13, 14.
ʼE feafeaʼi anai te maʼuli ʼi te temi ʼaē ka fai ai anai e Kilisito tona ʼuhiga pule ki te kele? Ko nātou ʼaē ka puleʼi e Kilisito, ʼe nātou maʼu anai te ʼu fua ʼo tanatou gāue. ʼE ʼui fēnei e te Tohi-Tapu ia Mikea 4:3, 4: “ ʼE nātou tahi heka anai ʼi tona lalo fuʼu vite pea mo tona lalo fuʼu fiku, pea ʼe mole ʼi ai anai he tahi ʼe ina fakamatakuʼi ia nātou, he ko te gutu ʼo Sehova ʼo te ʼatu kautau ʼaē neʼe ina tala te faʼahi ʼaia.” ʼE pulihi anai e te Puleʼaga ʼa te ʼAtua mo te ʼu fihifihia ʼo te mahaki pea mo te mate. (Isaia 25:8) ʼE kehe anai te mālama ʼaia! ʼE feala ke tou tui ki te ʼu fakapapau ʼaia ʼa te Tohi-Tapu heʼe haʼu mai te ʼAtua totonu.
ʼO hilifaki ki tana foaki he logo ʼo te ʼamanaki, ʼe tokoni mai te Tohi-Tapu kia tatou ke tou tauʼi te ʼu faigataʼaʼia ʼo te ʼaho fuli, ohage ko takita logoʼi ʼaē ʼe mole kita maʼuhiga heʼe kita masiva. Ko he Kilisitiano ʼe masiva ʼe ina ʼiloʼi ʼi tana ako te Tohi-Tapu, ʼe maʼuhiga kia mata ʼo te ʼAtua ohage pe ko te Kilisitiano ʼaē ʼe maʼu koloā. ʼE ʼui ʼi te Tohi-Tapu, ʼi te tohi ʼo Sopo, ko te ʼAtua “neʼe mole ina faka maʼuhigaʼi fau te tama ʼaliki ia ia ʼaē ʼe veliveli, koteʼuhi ko nātou fuli ʼe ko te gāue ʼo tona ʼu nima.” (Sopo 34:19) ʼE ʼofa tatau te ʼAtua kia nātou.—Gaue 10:34, 35.