Ko He Malamanei ʼe Pulihi Ai Te Agakovi
KOUTOU fakafuafua age muʼa, mo kapau ʼe koutou lavaʼi, ke ʼi ai he malamanei ʼe mole maʼu ai he ʼu hahaʼi agakovi! ʼE mole ʼaoga anai he kau polisi, mo he ʼu fale pilisoni, pea mo he ʼu fakatuʼutuʼu faigataʼa moʼo tauteaʼi te kau agakovi. ʼE ko he malamanei ʼe fefakaʼapaʼapaʼaki ai te hahaʼi ki te maʼuli pea mo te ʼu meʼa ʼe maʼu e ʼihi. ʼE koutou manatu koa ʼe mole moʼoni te ʼu meʼa ʼaia heʼe matalelei fau? ʼE lagi koutou manatu feiā, kae ko te toe fetogi fakaofoofo ʼaia ʼe ko te fakapapau ʼaia ʼaē ʼe talanoa tonu kiai te Tohi-Tapu. He koʼe koa ʼe mole tou vakaʼi peʼe koteā ʼaē neʼe fakakikite e te Tohi-Tapu ʼo ʼuhiga mo te ʼu aga ʼaē ʼe kovi pea mo te tahi ʼu māmio kovi ʼaē ʼe fai ʼi te kele ʼaenī?
ʼI te tohi ʼo te ʼu Pesalemo, ʼe tou lau fēnei: “ ʼAua naʼa ke ʼitaʼita ʼuhi ko te kau agakovi. ʼAua naʼa ke holi kia nātou ʼaē ʼe nātou maʼuliʼi te heʼe faitotonu. Heʼe ohage ko te vao, ʼe nātou fefe anai, pea ohage ko he vao foʼou ʼe nātou mamate anai. Kae ko te kau agavaivai ʼe nātou maʼu anai te kele, pea ʼe nātou fiafia moʼoni anai ʼi te mahu ʼo te tokalelei.” (Pesalemo 37:1, 2, 11) ʼI tona fakahagatonu, ʼe mole ʼi ai he tahi ʼe feala ke ina tāʼofi ia te ʼAtua ke ina fakahoko ia te fakapapau ʼaia pea mo te tahi ʼu fakapapau ʼaē ʼe fakaloto mālohi kia tatou.
Ko te puleʼaki ʼaē ka fakaʼaogaʼi e te ʼAtua moʼo ʼaumai te ʼu tapuakina ʼaia ʼe ko tona Puleʼaga. ʼI te Faikole ʼo Te Tāmai ʼe ʼi Selo, neʼe akoʼi e Sesu Kilisito ki tana kau tisipulo ke nātou faikole ke haʼu te Puleʼaga ʼaia pea ke hoko te finegalo ʼo te ʼAtua “i te kelekele o hage ko Selo.” (Mateo 6:9, 10) ʼAki te takitaki ʼo te Puleʼaga ʼaia, kua vave pe anai te mole kei maʼu ʼo he tahi ʼe ina fia fai he meʼa ʼe kovi ʼuhi ko te masiva, peʼe ko te maʼuli kinakina, peʼe ko tana manatu pe ʼaē kia ia totonu. Kae ʼe ʼui fēnei e te Folafola ʼa te ʼAtua: “ ʼE mahu anai te pulapula ʼi te kele; ʼe tapuke anai ʼi te tumutumu ʼo te ʼu moʼuga.” (Pesalemo 72:16) ʼI tona fakahagatonu, ʼe foaki anai e Sehova ʼAtua ki te hahaʼi fuli he ʼu tuʼuga meʼa lelei, pea ʼe mole toe ʼi ai anai hona gataʼaga. Ko te faʼahi ʼaē ʼe maʼuhiga tāfito, ʼe fakatafito anai te sosiete fakatagata ki te ʼofa ki te ʼAtua pea mo te kāiga, pea ʼe mole he temi ʼe toe fakalelu ai anai te malamanei e he aga ʼe kovi.