ʼE Ke Fakatuputupu Koa Tau Fakaofoofo?

KUA ke tokagaʼi koa te ʼu palalau ʼaē neʼe tau fai e te kau tagata faitohi ʼo te Tohi-Tapu, ʼi tanatou fakaofoofo ki te ʼu gāue pea mo te ʼu kalitate maʼuhiga ʼo te ʼAtua? Neʼe ʼui fēnei e te tagata fai pesalemo: “[ʼE] fakaofoofo toku faʼu.” (Pesalemo 139:14) Neʼe tohi fēnei e te polofeta ko Isaia: “Ê Sehova, ko koe toku ʼAtua. ʼE ʼau fakavikiviki kia te koe, ʼe ʼau vikiʼi tou huafa, he neʼe ke fai te ʼu meʼa fakaofoofo.” (Isaia 25:1) Peʼe ke fakakaukauʼi age muʼa te punamaʼuli pea mo te ōfo ʼe ʼiloga ʼi te ʼu palalau ʼaenī ʼa Paulo: “Oiau! ko te loloto o te koloa mo te poto pea mo te malama o te Atua!”​—Loma 11:33.

ʼE faka ʼuhiga fēnei te kupu “fakaofoofo” e te tikisionalio The Oxford Encyclopedic English Dictionary, “ko he meʼa ʼe kita logoʼi ʼo ʼuhiga mo he meʼa neʼe mole kita ʼamanaki kiai, peʼe ko he meʼa foʼou, peʼe ko he meʼa ʼe fakamahino gataʼa, kae tāfito ʼe ko he punamaʼuli ʼe fakapipiki kiai ia te fakaʼapaʼapa.”

ʼE mole kita fiafia koa la mokā kita sio ki te ʼu kiʼi fānau ʼe ʼiloga ʼi ʼonatou mata he fakaofoofo ʼi tanatou sio pea mo logoʼi ia he ʼu meʼa foʼou? Kae meʼa fakaʼofaʼofa foki, heʼe ʼaki te temi, kua fakahaʼuhaʼu ʼo puli te fakaofoofo ʼa te hahaʼi ki he ʼu meʼa foʼou.

Kae ʼo ʼuhiga mo te kau tagata faitohi ʼo te Tohi-Tapu ʼaē neʼe tou talanoa ki ai ʼi muʼa atu, neʼe fakaofoofo kia nātou te ʼu meʼa ʼaē neʼe nātou sio pea mo logo kiai. Neʼe ko he meʼa ia neʼe tologa. Koteā tona tupuʼaga? Neʼe nātou fakatuputupu ia nātou tanatou fakaofoofo ki te ʼu meʼa ʼaia, he neʼe nātou metitasio pea mo fakafetaʼi ki te ʼu gāue ʼa te ʼAtua. Neʼe faikole fēnei te tagata fai pesalemo: “Neʼe ʼau manatuʼi te ʼu ʼaho ki muʼa atu; neʼe ʼau metitasio ki tau ʼu gāue fuli; ʼaki he lotolelei neʼe ʼau fia tokagaʼi tuʼumaʼu te ʼu gāue ʼo tou ʼu nima.”​—Pesalemo 143⁠:⁠5.

ʼE ko he meʼa lelei mo kapau ko te kau atolasio ʼa te ʼAtua ʼo te temi nei ʼe ia nātou te fakaofoofo ʼaia! ʼE ke maʼu koa te faʼahi ʼaia? ʼE ke fakatuputupu koa ia te faʼahi ʼaia?