Te ʼu Fehuʼi ʼa Te Kau Lautohi
Ohage ko tona tuʼu ia Senesi 38:15, 16, he koʼe neʼe fai e Suta he ʼu felāveʼi fakasino mo he fafine neʼe ina ʼui ʼe ko he fafine paomutu?
Neʼe manatu ia Suta neʼe ina fai he ʼu felāveʼi fakasino mo he fafine paomutu, kae neʼe faihala. Koʼeni te meʼa ʼaē neʼe hoko, ohage ko tona fakamatala ia Senesi kapite 38.
ʼI muʼa ʼo te tupu ʼo he foha ʼo te ʼuluaki foha ʼo Suta, ʼaki ia Tamale tona ʼohoana, neʼe matehi ia ia koteʼuhi “neʼe agakovi kia mata ʼo Sehova.” (Senesi 38:7) ʼI te temi ʼaia, ʼi te agaʼi fenua, neʼe tonu ki te holotuʼa ke ina ʼohoanaʼi te ʼohoana ʼo tona tēhina. Kapau neʼe mate he tagata ʼohoana kae mole ʼi ai hona hōloga, neʼe tonu ki tona tēhina ke ina ʼohoanaʼi tona ʼohoana moʼo fakahoko te potu ʼaia. Kae ko te lua foha ʼo Suta, ia Onane, neʼe fakafisi ki te maʼua ʼaia, pea neʼe matehi ia ia e te ʼAtua. Pea neʼe toe fekauʼi ai e Suta ia Tamale, ke toe liliu ki te ʼapi ʼo tana tāmai, ʼo aʼu ki te lahilahi ake ʼo tona tolu foha, ia Sela, ke feala hanā ʼohoana. Kae hili ni ʼu taʼu, neʼe mole foaki e Suta ia Sela ke ʼohoana mo Tamale. Koia ʼi te ʼosi mate ʼo te ʼohoana ʼo Suta, neʼe fai e Tamale tana fakatuʼutuʼu ke ina maʼu hona hōloga ia Suta, te tagata Iselaele ʼaē neʼe ko te tāmai ʼo tona ʼohoana. Neʼe teuteu ohage ko he fafine paomutu ʼo te fale lotu, pea neʼe heka ʼi te loaloaga ʼo te ala, he neʼe ina ʼiloʼi ʼe fakalaka ai anai ia Suta.
ʼI tana mole ʼiloʼi ʼaē neʼe ko Tamale, neʼe fai e Suta he ʼu felāveʼi fakasino mo te fafine ʼaia. ʼAki he faiva kākā, neʼe kole age e Tamale kia ia he ʼu meʼa ʼaʼana moʼo totogi ʼaki tana ʼu felāveʼi fakasino, pea ki muli age neʼe faitama. ʼI tana ʼiloʼi leva ia te moʼoni ʼo ʼuhiga mo te faʼahi ʼaia, neʼe mole tukugakoviʼi ia ia e Suta, kae ʼaki he agavaivai neʼe ina ʼui fēnei: “ ʼE faitotonu age ia ʼau, koteʼuhi neʼe mole ʼau ʼavage kia ia toku foha ko Sela.” Pea “neʼe mole toe ʼalu ia [ia Suta] kia ia.”—Senesi 38:26.
Neʼe mole lelei te aga ʼa Suta, ʼi tana mole foaki ia Tamale ki tona foha ko Sela, ohage ko tana fakapapauʼi age ki ai. Tahi ʼaē meʼa, neʼe ina fai te ʼu felāveʼi fakasino mo te fafine neʼe ʼi tana manatu, ʼe ko he fafine paomutu ʼo te fale lotu. Koia neʼe mole mulimuli ki te fakatuʼutuʼu ʼa te ʼAtua, ʼaē neʼe ina fakagafua ki te tagata ke gata pe tana ʼu felāveʼi fakasino mo tona ʼohoana. (Senesi 2:24) Koia ʼi tona fakahagatonu, neʼe mole fai e Suta he ʼu felāveʼi fakasino mo he fafine paomutu. Kae ʼi tana mole ʼiloʼi, neʼe ina fai te faʼahi ʼaē neʼe tonu ke fai e tona foha ko Sela, ke ina ʼohoanaʼi te ʼohoana ʼo tona tēhina, pea mo ina fakatupu hona hōloga.
ʼO ʼuhiga mo Tamale, ko tana aga ʼaia neʼe mole ko he aga heʼeʼaoga. Ko tana mahaga tagata, neʼe mole ʼui ʼe ko he ʼu foha taka. ʼI te temi ʼaē neʼe ʼohoanaʼi ai e Poase ia Lute, ʼo mulimuli ki te lao ʼaē neʼe ina fakatotonu ke ʼohoanaʼi e te holotuʼa ia te ʼohoana ʼo tona tēhina, ko te kau tagata ʼāfea ʼo Petelehemi, neʼe nātou vikiʼi ia Pelesi, tama ʼa Tamale, ʼo nātou ʼui fēnei kia Poase: “ ʼOfa pe ke liliu tou loto fale ohage ko te loto fale ʼo Pelesi, tama ʼa Tamale pea mo Suta, ʼaki te hōloga ʼaē ka foaki atu anai e Sehova ʼaki te fafine finemui ʼaia.” (Lute 4:12) ʼE toe kau foki ia Pelesi ʼi te ʼu kui ʼa Sesu Kilisito.—Mateo 1:1-3; Luka 3:23-23.