Te ʼu Fehuʼi ʼa Te Kau Lautohi

ʼI te temi ʼo te Iselaele ʼāfea, neʼe mole maʼu e te kau Levite honatou tofiʼa. Kae he koʼe koa ʼe ʼui e te vaega ʼo Selemia 32⁠:​7, neʼe fakatau e te tagata Levite ko Anamele tana gāueʼaga ki tona tēhina mataʼi tama ko Selemia?

ʼO ʼuhiga mo te kau Levite, neʼe ʼui fēnei e Sehova kia Alone: “ ʼE mole foaki atu anai [hokotou] tofiʼa . . . pea ʼe mole [koutou] maʼu anai [hokotou] vaega ʼi te lotolotoiga ʼo [Iselaele].” (Faka au 18⁠:20) Kae neʼe tuku age ki te kau Levite te ʼu kolo e 48 pea mo te ʼu gāueʼaga ʼi te ʼu potu kehekehe ʼo te Kele ʼo Te Fakapapau. Neʼe tupu ia Selemia ʼi Anatote, ko he kolo ʼe kau ki te ʼu kolo ʼaē neʼe tuku age ki “te ʼu foha ʼo Alone, te kau pelepitelo.”​—Sosue 21⁠:​13-​19; Faka au 35:​1-8; 1 Fakamatala 6:​54, 60.

ʼE tou lau ia Levitike 25⁠:​32-​34, neʼe fai ai e Sehova te ʼu fakatotonu ʼo ʼuhiga mo te “toe totogi” ʼo te ʼu kele ʼa te kau Levite. ʼE mahino papau ia, ko ʼihi famili Levite neʼe feala ke nātou maʼu faka tofiʼa te ʼu kele, mo nātou fakaʼaogaʼi pea mo totogi te ʼu kele ʼaia. Pea neʼe kau kiai mo te fakatau pea mo te toe totogi ʼo he kele.a ʼE lahi te ʼu ʼaluʼaga neʼe maʼu ai pea mo fakaʼaogaʼi e te kau Levite te ʼu kele, ohage ko te kau Iselaele ʼo te tahi ʼu telepi.

ʼE mahino ia, ko te taʼi kele ʼaia ʼa te kau Levite, neʼe ko he tofiʼa faka famili. Kae ʼuhi ko te “feala ke toe totogi” e te kau Levite tonatou moʼi kele, koia neʼe feala aipe ke nātou fefakatauʼaki ia nātou kau Levite. Tahi ʼaē meʼa, neʼe lagi feala pe hanatou fakatau pea mo toe totogi he kele ʼi te ʼu kele pe ʼo te ʼu kolo ʼaē ʼe nātou nonofo ai, he neʼe mole feala ke nātou fakatau “te gāueʼaga ʼo te kele ʼo tonatou ʼu kolo,” koteʼuhi neʼe ko “he kele maʼa nātou ʼo aʼu ki he ʼu temi ʼe mole ʼiloʼi honatou gataʼaga.”​—Levitike 25⁠:​32, 34.

Koia, ʼe mahino mai ai ko te kele ʼaē neʼe toe totogi e Selemia mai ia Anamele, neʼe ko te ʼu faʼahiga kele ʼaia, ʼaē neʼe feala hona toe totogi. Neʼe lagi tuʼu ʼi te ʼu loto tuʼakoi ʼo te kolo. Neʼe ʼui tonu e Sehova ko “te gāueʼaga” ʼaia, neʼe ʼa Anamele pea neʼe “feala ke toe totogi” e Selemia. (Selemia 32⁠:​6, 7) ʼI hona ʼaluʼaga fakatā, neʼe fakaʼaogaʼi e Sehova te faʼahiga fakatau ʼaia moʼo fakamālohiʼi tana fakapapau ʼaē neʼe ina ʼui ai, ko te kau Iselaele ʼe nātou toe liliu anai ʼo toʼo tonatou tofiʼa ʼo te fenua, ʼi te ʼosi ʼo tonatou temi ʼaunofo ʼi Papiloni.​—Selemia 32⁠:​13-15.

ʼE mole fakahā mai e te Tohi-Tapu pe neʼe maʼu fakakākā e Anamele he kele ʼi Anatote. ʼE mole tou lava ʼui ko Anamele neʼe ina maumauʼi te lao ʼa Sehova, ʼi tana ʼui age kia Selemia ke ina totogi te gāueʼaga ʼaia ʼi Anatote, peʼe tou ʼui neʼe fakaʼaogaʼi kovi e Selemia tana fealagia ke ina toe totogi te gāueʼaga ʼaia.​—Selemia 32⁠:​8-15.

[Kiʼi nota]