ʼE Feala Koa Ki Te Tui Ke Ina Fakamālōlō Ia Te Kau Mahahaki?

MOKĀ tou mahahaki, ʼe tou kumi he faitoʼo peʼe ko he fakamālōlō. ʼE lagi koutou ʼiloʼi ʼe ʼui e te Tohi-Tapu neʼe lahi te ʼu fakamālōlō neʼe fai e Sesu Kilisito, ʼo ina fakamālōlō te ʼu faʼahiga mahaki fuli pe, pea mo fakafimālieʼi te tokolahi ʼaē neʼe maʼuli mamahi. Koteā ʼaē neʼe feala ai ke ina fakahoko te ʼu fakamālōlō ʼaia? ʼE ʼui e te Tohi-Tapu, neʼe fai te faʼahi ʼaia ʼaki te “Mafimafi o te Atua.” (Luka 9:​42, 43; Gaue 19⁠:​11, 12) Koia, neʼe mole gata pe ki te tui ʼa te hahaʼi kae neʼe ko te laumālie maʼoniʼoni ʼo te ʼAtua ʼaē neʼe ina fakamālōlō ia nātou. (Gaue 28:​7-9) Ko te tupuʼaga la ʼaia ʼo te mole kole e Sesu ki te hahaʼi mahahaki ke nātou tui kia te ia ke feala honatou fakamālōlō.

E lagi koutou fia fehuʼi: ‘Neʼe hoko pe koa te ʼu fai milakulo ʼa Sesu ʼi te temi muʼa, peʼe feala anai koa ke toe hoko ʼi te temi nei? ʼE ʼi ai koa he ʼamanaki ki te hahaʼi ʼaē ʼe nātou tau mo he mahaki ʼe mole feala hona faitoʼo?’

ʼE fakamahino mai e te Tohi-Tapu, ʼi te mālama foʼou pea mo faitotonu ʼa te ʼAtua, ʼe toe fakahoko anai e te māfimāfi ʼo te ʼAtua te ʼu milakulo ʼaē neʼe fai e Sesu ʼi tana kei maʼuli ʼi te kele. Ko te kau Fakamoʼoni ʼa Sehova ʼo tokotou kolo, ʼe nātou fiafia anai ʼi hanatou fakamahino atu peʼe ko te temi fea ʼaē ka fakahoko ai e te ʼAtua te ʼu meʼa ʼaē ʼe mole lava fai e te kau hahaʼi ʼaē ʼe nātou fai te ʼu fakamālōlō faka milakulo, ohage la ko te pulihi ʼo te ʼu mahaki fuli pea mo te pulihi ʼo te mate. Ei, ko te ʼAtua “ ʼe ina fakaʼauha moʼoni anai te mate ʼo talu ai.”​—Isaia 25⁠:8.