ʼE Tou ʼIloʼi Anai Koa ʼi He ʼAho Ia Te Fīmālie Moʼoni?
KUA tou sio fuli ki he ʼu tamaliki ʼe nātou gaoʼi fakafiafia mo tanatou ʼu mātuʼa. ʼAki tanatou nonofo mo tanatou ʼu mātuʼa, ʼe mole nātou ʼiloʼi te tuʼania. Kae tokolahi te ʼu tamaliki ʼe mole nātou ʼiloʼi te taʼi maʼuli fiafia ʼaia. Ko ʼihi ʼe nātou nonofo tuʼania ʼi te ʼaho fuli peʼe nātou momoe anai ʼifea. ʼE ʼi ai koa he ʼamanaki ki te faʼahiga tamaliki ʼaia ʼaē ʼe mole ʼi ai honatou ʼapi pea mo ʼihi ʼe nātou nonofo ʼi te mataku?
Logope ʼe hage mai ʼe mole ʼi ai he ʼamanaki ki te ka haʼu, kae ʼe foaki mai te ʼamanaki ʼi te Folafola ʼa te ʼAtua. Neʼe fakakikite e te polofeta ko Isaia ʼe hoko mai anai he ʼaho ʼe tou māʼuʼuli fuli anai ʼi te fīmālie kātoa. Neʼe ina tohi fēnei: “ ʼE mahino papau ia, ʼe nātou laga anai ni ʼu fale pea ʼe nātou nofoʼi anai; pea ʼe mahino papau ia ʼe nātou to anai he ʼu fuʼu vite pea mo nātou kai anai tonatou ʼu fua. ʼE mole nātou laga anai ke nofoʼi e he tahi kehe; pea ʼe mole nātou to anai ke kai e he tahi kehe.”—Isaia 65:21, 22.
Kae ʼe ʼi ai koa he fakatafito moʼoni ʼo te ʼamanaki ʼaia? ʼE moʼoni, ʼe mole faka ʼuhiga tuʼumaʼu e te kupuʼi palalau “ ʼamanaki” ki he meʼa ʼe hoko papau. Ohage la, ʼi Pelesile, ʼe tou tautau logo ki te tākuga lea ʼaenī: “Ko te ʼamanaki ʼe ko te meʼa ʼaia ʼe hoki mate fakamuli.” Ko tona fakaliliu, tokolahi te hahaʼi ʼe nātou nofo ʼamanaki aipe, tatau ai foki peʼe mole ʼi ai he fakatafito moʼoni ki te ʼamanaki. Kae ko te ʼamanaki ʼaē ʼe foaki mai e te ʼAtua maʼuli kiā tatou ʼe kehe ia. Neʼe tohi fēnei e te ʼapositolo ko Paulo: “Ko te tagata fuape e tui [ki te ʼAtua] e mole ufiufi anai.” (Loma 10:11) ʼAki te ʼu fakakikite faka Tohi-Tapu ʼaē kua hoko, ʼe tou falala ʼe fakahoko moʼoni anai e Sehova ʼAtua tana ʼu fakapapau fuli ʼaē. Ka hoko anai te ʼu fakapapau ʼaia, pea ʼe mole tou toe sisio anai ki te maʼuli fakaʼofaʼofa ʼa te tamaliki ʼi te ala.
Māʼia foki mo te temi nei, ʼe lava tokoni ia te Tohi-Tapu kiā nātou ʼaē ʼe heʼe ʼamanaki ke nātou hikihiki tonatou maʼuli pea mo nātou maʼu he fīmālie moʼoni. ʼE lava hoko feafeaʼi ia te faʼahi ʼaia? ʼE fiafia anai ia te kau Fakamoʼoni ʼa Sehova ʼo tokotou nofoʼaga ʼi te tokoni atu kia koutou ke koutou maʼu te tali ki te fehuʼi ʼaia.