ʼE Koutou Fakaʼamu Koa Ki He Mālama ʼe Mole Toe ʼi Ai Ia Te Tuʼania?

“ ʼE tou lolotoga maʼuʼuli ‘ ʼi he temi ʼe tou tuʼania tuʼumaʼu ai pea mo . . . tou heʼe ʼamanaki,’ ʼuhi ‘ko he tuʼutāmaki ʼe mole tou mahino lelei kiai, kae ʼe feala ke hoko fakapunamaʼuli mai ʼi he temi pe peʼe ʼi he faʼahiga ʼaluʼaga pe.’ ”

KO TE ʼu palalau ʼaia neʼe fai ʼi te nusipepa Newsweek ʼo te taʼu kua hili, ʼe ina fakahā mai ia te ʼu meʼa ʼaē ʼe logoʼi e te hahaʼi tokolahi ʼaē ʼe maʼuʼuli ʼi te mālama maveuveu ʼaenī. Neʼe fakahā e Sesu Kilisito ʼe fakaʼāsili anai te ʼu meʼa ʼaia ʼi te temi ka haʼu. Neʼe ina fakakikite, ʼe ʼi ai anai he temi ʼe lahi ʼaupito anai ia te tuʼania ʼa te ʼu puleʼaga, pea ʼe matapopō mo matataku anai ia te hahaʼi ʼi te ʼu meʼa ka hoko ki te kele katoa. Kae ʼe mole tonu ke tou tuʼania koteʼuhi neʼe toe ʼui fēnei e Sesu: “Ka kamata hoko mai ia mea aia, koutou tuuʼake mo hiki ake outou fofoga, koteuhi kua fakaovi mai toutou haofaki.”—Luka 21:25-28.

Neʼe fakamatala e Sehova ʼAtua te ʼu ʼaluʼaga ʼo te maʼuli ʼo tana hahaʼi ʼi te kele ʼi tonatou ʼosi hāofaki: “ ʼE nofo anai taku hahaʼi ʼi he nofoʼaga ʼe maʼu ai te tokalelei, ʼi he ʼu nofoʼaga ʼo te falala katoa pea mo he ʼu mālōlōʼaga fīmālie.” (Isaia 32:18) ʼAki tana polofeta ko Mikea, neʼe ʼui fēnei e Sehova: “ ʼE moʼoni, ʼe nātou tahi heka anai ʼi tona lalo fuʼu vite pea mo tona lalo fuʼu fiku, pea ʼe mole ʼi ai anai he tahi ʼe ina fakamanavaheʼi ia nātou.”—Mikea 4:4.

ʼE kehekehe ʼaupito anai ia te maʼuli ʼaia pea mo te maʼuli ʼo te temi nei! ʼE mole toe nofo tuʼania anai ia te hahaʼi. ʼE mole nātou hoha tuʼumaʼu anai pea mo heʼe ʼamanaki, kae ʼe nātou nonofo anai ʼi te fīmālie pea mo te fiafia ʼo talu ai.