Te Temi Kai—ʼE Mole Ko He Temi Pe Ki Te Kai!
ʼE TOU leleiʼia fuli he meʼa kai ʼe kano lelei. Kā fakapipiki mai ki te kai ia he fai palalau lelei mo he ʼu hahaʼi ʼe koutou ʼoʼofa ai, pea ʼe liliu te temi kai ko he lakaga fakafiafia kae ʼe mole ko he lakaga pe moʼo fakafimālieʼi tata pakupaku. ʼE lahi te ʼu famili ʼe nātou faigaʼi ke nātou fakatahi tuʼa tahi ʼi te ʼaho ke nātou kakai fakatahi. Ko te temi kai ʼe ko he faigamālie ki te famili ke nātou palalau ki te ʼu meʼa ʼaē neʼe hoko ʼi te ʼaho peʼe nātou fai palalau ʼo ʼuhiga mo tanatou ʼu fakatuʼutuʼu. Ko te ʼu mātuʼa ʼaē ʼe nātou fakalogo ki te ʼu fakamatala ʼo tanatou ʼu fānau ʼe feala ke nātou ʼiloʼi ai te fakakaukau pea mo te ʼu meʼa ʼaē ʼe ʼi te loto ʼo nātou liliki. ʼAki te temi, ko te ʼu fakatahi fakafiafia ʼi te ʼu temi kai ʼe fakatuputupu ai ʼi te maʼuli faka famili ia te fīmālie, mo te falala, pea mo te ʼofa ʼaē ʼe tokoni ki te tuʼu maʼu ʼo te logo tahi ʼo te famili.
ʼI te temi nei, kua faigataʼa ki te famili hanatou maʼopoʼopo ke nātou kakai fakatahi, ʼuhi ko tanatou maʼumaʼua tuʼumaʼu. ʼI ʼihi agaʼi fenua, ʼe mole lelei he kakai fakatahi ʼo te famili peʼe nātou fai palalau lolotoga te temi kai. Ko ʼihi famili ʼe nātou fakahaʼele te televisio ʼi te temi kai, ʼo pulinoa ai te tahi faigamālie ki te felogoi.
Kae ko te ʼu mātuʼa Kilisitiano ʼe nātou kumi tuʼumaʼu he ʼu faigamālie ke nātou fakamālohiʼi tonatou maʼuli faka famili. (Tāʼaga Lea 24:27) ʼI muʼa mamaʼo atu, neʼe kua ʼui age ki te ʼu mātuʼa ia te temi faigamālie ʼaē ʼe lelei ke nātou fakahū ai ia te Folafola ʼa te ʼAtua ki tanatou fānau, ʼe ko ‘te temi ʼaē ʼe nātou heheka ai ʼi tonatou loto fale.’ (Teutalonome 6:7) Ko te heheka fakatahi tuʼumaʼu ʼi he temi kai ʼe ko he faigamālie makehe ʼaia ki te ʼu mātuʼa ke nātou fakatuputupu ʼi tanatou fānau ia he ʼofa mamahi kiā Sehova pea mo tana ʼu pelesepeto faitotonu. Kā koutou fakaliliu te temi kai ko he lakaga fakafiafia pea mo fīmālie, ʼe toe liliu ai foki ko he lakaga ʼe leleiʼia e te famili pea mo toe feala ai foki ke nātou fefakaloto mālohiʼaki. Ei, koutou faigaʼi ke mole liliu te temi kai ko he temi pe ki te kai!