“Neʼe Nātou Pipiki Maʼu Ki Tanatou Tauhi”

“NEʼE ʼui fēnei e Sesu Kilisito ki tana ʼu tisipulo: “Manuia ia koutou moka valoki koutou, mo fakatagai koutou pea mo lau atu te kovi fuape kia koutou, o natou lohi ai talia ko au.” (Mateo 5:11) Ia ʼaho nei, ʼe fiafia te kau Fakamoʼoni ʼa Sehova koteʼuhi ʼi tanatou mulimuli ki te akonaki ʼa Kilisito pea mo tana faʼifaʼitaki, ʼe ‘mole nātou kau ʼi te malamanei,’ pea ʼe mole nātou tali ke ʼi ai hanatou pipikiga mo te ʼu meʼa faka politike pea ʼe nātou agatonu ki te ʼAtua ʼi te ʼu ʼaluʼaga fuli.​—Soane 17:14; Mateo 4:​8-10.

ʼO ʼuhiga mo te pipiki maʼu ʼa te kau Fakamoʼoni ʼa Sehova ki tanatou tauhi ʼi te Lusia ʼāfea, ʼo kau ai mo nātou ʼo Estonie, ʼe tohi fēnei e te tagata fakaliliu Tohi-Tapu pea ʼe fai teolosia ʼi te Lotu ʼo Lutelo, ko Toomas Paul ʼi tana tohi Kirik keset küla (Te Pikisia ʼa Te Lotu ʼi Te Meʼa ʼo Te Kolo): “Tokosiʼi te hahaʼi ʼe nātou ʼiloʼi te meʼa ʼaē neʼe hoko ʼi te māfoatā ʼo te ʼaho 1 ʼo ʼApelili 1951. Neʼe fai te fakatuʼutuʼu ke kapu te kau Fakamoʼoni ʼa Sehova mo te hahaʼi ʼe kau mo nātou​—ko te toko 279 neʼe puke pea neʼe fetuku ki Sibérie . . . Neʼe ʼi ai tonatou faigamālie ke nātou sinie he pepa ʼe nātou fakafisi ai ki tanatou tui ke ʼaua naʼa ʼave nātou peʼe pilisoniʼi ia nātou. . . . ʼO fakatahi mo nātou ʼaē neʼe puke ʼi muʼa atu, ko te toko 353 neʼe pilisoniʼi ʼo kau te toko 171 hahaʼi neʼe nātou fakatahi feiā pe mo tonatou ʼu kokelekasio. Neʼe nātou pipiki maʼu ki tanatou tauhi, māʼia mo tonatou ʼave ki Sibérie. . . . Ko te tokosiʼi ʼo te hahaʼi ʼo te Lotu [ʼo Lutelo ʼi Estonie,] neʼe nātou maʼu he tui ohage ko te kau Fakamoʼoni ʼa Sehova.”

Ko te kau Fakamoʼoni ʼa Sehova ʼi te malamanei kātoa, ʼe nātou falala ʼe tokoni age te ʼAtua ke nātou nonofo agatonu pea mo fakalogo kiā te ia logola te ʼu fakataga. ʼE nātou fakafiafia ʼi tanatou ʼiloʼi ʼaē ʼe lahi tonatou fakapale ki tanatou agatonu.​—Mateo 5:12.