Ko He Fagona Loaloaga Neʼe Fua Lelei

KO TE fakamatala ʼaenī ʼe haʼu mai te tautēhina fafine ʼo te Lepupilika Temokalatike ʼo Congo, neʼe nā fakatuʼutuʼu ke nā fakahoko he fagona loaloaga ʼi te ʼu koga meʼa ʼaē ʼe hoko ai te tau, ke feala hanā kaku ki Lisala, te kolo ʼaē neʼe fai ai te Fakatahi Faka Tisitilike “Koutou Faka Kolōlia Ki Te ʼAtua.” ʼO hilifaki ki te ako fakalaumālie pea mo te fakatahi mo te ʼu tēhina mo tuagaʼane ʼaē neʼe nā fakaʼamu ke nā fakatahi mo nātou, neʼe nā faiga ʼaupito ke nā felāveʼi mo he kau fakafofoga ʼo te filiale ʼo te kau Fakamoʼoni ʼa Sehova ʼi Kinshasa. ʼUhi ko te tau faka sivile ʼi te fenua, kua lauʼi taʼu tanatou mole heʼeki toe fesioʼaki mo he tahi ʼo te filiale, pea neʼe nā fakaʼamu age ke nā maʼu honā faigamālie ʼo ʼuhiga mo te faʼahi ʼaia.

Neʼe ʼolo te ʼu tuagaʼane ʼi te kiʼi vaka fakafenua, mai tonā kolo ko Basankusu ki Lisala, ko kilometa e 300, ʼo nā fakalaka ʼi te ʼu vao matuʼa pea mo te ʼu vaitafe e lua. Neʼe vāhaʼa tolu tanā fagona. ʼE nā pionie toko lua, ko te tahi kua taʼu 3 tana gāue pionie pea ko te tahi kua taʼu 19, koia neʼe nā fakaʼaogaʼi te faigamālie ʼo tanā fagona ke nā faka mafola te logo lelei ʼo te Puleʼaga. Neʼe nā fai te ʼu hola e 110, ʼo nā fai faka mafola kiā nātou ʼaē neʼe felāveʼi mo nāua ʼi tanā fagona, mo tufa ai te ʼu kiʼi pepa lotu e 200 pea mo te ʼu kaupepa lalahi e 30.

ʼI tanā ʼolo ʼi te vaitafe, neʼe nā fakalaka iā tafa ʼo te ʼu foʼi manu lalahi ʼi te koga meʼa ʼaia, ko te ʼu hippopotames pea mo te ʼu kolokotile. Neʼe tuʼu tanā fagona mokā pōʼuli​—neʼe mole ʼaoga he hoko ʼalu ʼi te pōʼuli! Neʼe toe lahi foki mo te ʼu koga meʼa neʼe nā fakalaka ai, neʼe tutuʼu ai te kau solia ʼo huke te hahaʼi.

Logope neʼe ko he fagona loaloaga ʼaupito pea mo fakagaʼegaʼe, kae neʼe fiafia te ʼu tuagaʼane. Neʼe lahi ʼaupito tanā fakafetaʼi ki tanā kau ki te fakatahi ʼi Lisala. Neʼe nā fiafia ʼaupito ki te moʼoni, pea neʼe fakaloto mālohiʼi ia nāua e te ʼu tēhina mo tuagaʼane e toko 7 000 ʼaē neʼe kau ki te fakatahi. ʼI te hili ʼo te fakatahi, pea ʼi tanā toe liliu kiō nāua, neʼe nā toe felāveʼi mo te ʼu faigataʼaʼia ʼaē neʼe tau mo nāua ʼi tanā ʼolo ki te fakatahi, kae neʼe nā tau haohaoa atu ki tonā ʼu famili.