Te Tokoni Ki Te ʼu Meʼa ʼAē ʼi Totatou Loto

ʼI ʼIHI temi, ʼe hage koa ʼe puleʼi tokotou maʼuli e te ʼu manatu faka lotovaivai? ʼE vave koa hakotou lotovaivai, peʼe ʼita, peʼe loto fītaʼa? ʼE mamafa koa kiā koutou te ʼu hoha ʼo te maʼuli? Koteā ʼaē ka tokoni anai kiā koutou?

Ko te ʼu meʼa ʼaē ʼe tou logoʼi ʼi totatou loto, ʼe kau ki te ʼu meʼa ʼaē ʼe hoko ʼi totatou maʼuli. Kapau ʼe tou puleʼi fakalelei te ʼu meʼa ʼaē ʼi totatou loto, pea ʼe feala ke fakafiafia ai ki totatou maʼuli. Kae ʼe fakahā lelei ʼi te Tohi-Tapu, “ko te pule fakamālohi ʼe feala ke ina fakaliliu ʼo vale te tagata ʼaē ʼe poto.” (Tagata Tānaki 7:7) ʼI he mālama ʼe tau hoko ai te ʼu agamālohi pea mo te ʼu tuʼutāmaki, ʼe malave ki totatou loto te ʼu meʼa ʼaē ʼe hoko ʼi ʼotatou tafa. Kae ʼe toe ʼui foki ʼi te Tohi-Tapu: “ ʼE mole he meʼa ʼe lelei age ki te tagata ʼi tona fiafia ʼi tana ʼu gāue.” (Tagata Tānaki 3:22) Ke feala hatatou fiafia ʼi totatou maʼuli, ʼe ʼaoga ke tou maʼu he ʼu manatu fakaloto mālohi ke feala hatatou loto fiafia ai. E lava feafeaʼi koa hatatou gāueʼi ʼi totatou loto he ʼu manatu ʼe lelei, pea mo fakagata te ʼu manatu ʼaē ʼe fakatupu lotovaivai?

Kapau ʼe tou fai he ʼu puleʼaki, ʼe tou fakamaʼamaʼa anai te ʼu manatu ʼaē ʼe fakaloto vaivai ʼi totatou loto. Ohage la, kapau ʼe hoha totatou ʼatamai ki he ʼu meʼa ʼe mole tou lava puleʼi, ʼe lagi lelei age hatatou fetogi tatatou ʼu agamāhani peʼe ko tatatou faʼahiga maʼuli ke puli te hoha ʼaia ʼi totatou ʼatamai. Kapau ʼe tou haʼele, peʼe tou fakalogo he musika ʼe fakafimālie, peʼe tou faigaoʼi peʼe tou fai he meʼa ʼe ʼaoga ki he tahi, ʼe tou lava maʼu ai he fakafimālie pea mo he faʼahiga maʼuli fiafia.​—Gaue 20:35.

Kae ko te faʼahiga fai ʼaē ʼe lelei age moʼo pulihi te ʼu manatu faka lotovaivai, ʼe ko tatatou falala ki te Tupuʼaga. Kapau ʼe nofo hoholo te ʼu manatu fakaloto vaivai, ʼe tonu ke tou ‘vevete ki te ʼAtua tatatou ʼu tuʼania fuli.’ (1 Petelo 5:​6, 7) ʼE tou maʼu te fakaloto fīmālie ʼaenī ʼi te Tohi-Tapu: “Ko Sehova ʼe ōvi kiā nātou ʼaē ʼe lavea tonatou loto. . . . ʼE lahi te ʼu malaʼia ʼo te tagata agatonu, kae ʼe hāofaki e Sehova ia ia mai te ʼu malaʼia fuli ʼaia.” (Pesalemo 34:​18, 19) ʼE lava feafeaʼi koa hatatou falala ko te ʼAtua ʼe lava “tokoni [mai kiā tatou] pea mo Ina fakahāo tatou”? (Pesalemo 40:17) ʼE feala ke tou maʼu te falala ʼaia mo kapau ʼe tou ako ia te Tohi-Tapu, pea mo tou fakakaukauʼi ia te ʼu faʼifaʼitaki moʼoni ʼaē neʼe fakahā ai e te ʼAtua tana tokaga ʼo foaki ki tana ʼu kaugana te ʼu meʼa ʼaē ʼe lelei kiā nātou.