Neʼe ʼUluaki Fakatagaʼi Nāua, Pea Ki Muli Age Neʼe ʼOfainaʼi

ʼI HE ʼu taʼu ki muʼa atu, ko Santiago pea mo tona ʼohoana ia Lourdes, neʼe nā ʼolo ki te kiʼi kolo matalelei ʼo Huillcapata, ʼi Pelu, moʼo faka mafola ki te hahaʼi ʼo te kiʼi kolo ʼaia, ia te logo ʼo te ʼamanaki ʼaē ʼe maʼu ʼi te Tohi-Tapu. Kae neʼe tau age leva ia te pātele mai Cuzco ʼo ina fakamāʼopoʼopo ia te hahaʼi ʼo te kolo. Neʼe fai age e te pātele te ʼu fakatokaga ʼo ina ʼui, ko te ʼu Fakamoʼoni ʼa Sehova ʼe nā ʼaumai anai he malaʼia pea mo he nive fakamataku, pea ʼe mamate ai anai tanatou ʼu faga manu pea mo maumauʼi tanatou ʼu gāueʼaga.

Tokolahi neʼe nātou tui ki te “lea faka polofeta” ʼaia, pea lolotoga te vaeluaʼi taʼu, neʼe mole he tahi ʼi te kolo neʼe ina tali te fakaafe ʼa Santiago pea mo Lourdes ki te ako ʼo te Tohi-Tapu. Ko te kovana ʼo te kolo, ʼaē ʼe higoa ko Miguel, neʼe ina kapu ki te ala ia Santiago mo Lourdes, pea mo ina tuki makaʼi nāua. Kae ʼaki te tokalelei neʼe nā fai tuʼumaʼu aipe tanā aga faka Kilisitiano.

ʼAki te temi neʼe tali e ʼihi hahaʼi ʼo te kolo he ako faka Tohi-Tapu. Māʼiape la mo Miguel, neʼe ina fetogi tana aga. Neʼe ina kamata ako te Tohi-Tapu mo Santiago, ʼo ina tuku tana ʼinu pea neʼe liliu ai ko he tagata ʼe manako ki te tokalelei. ʼAki te temi, ko Miguel, mo tona ʼohoana, pea mo tona ʼu ʼofafine e toko lua, neʼe nātou tali ia te moʼoni ʼo te Tohi-Tapu.

ʼI te temi nei, ʼi te kolo ʼaia ʼe tuputupu lelei te kokelekasio ʼa te kau Fakamoʼoni ʼa Sehova. ʼE fiafia ia Miguel heʼe lahi te ʼu maka neʼe mole ʼī ai Santiago pea mo Lourdes ʼi tana tuki makaʼi nāua, pea ʼe fakafetaʼi kiā nāua ʼi tanā tuku ʼo he faʼifaʼitaki lelei ʼo ʼuhiga mo te maʼuliʼi ʼo te tokalelei.

[Paki ʼo te pasina 32]

Ko te manako ʼa Santiago pea mo Lourdes ki te tokalelei (ʼi ʼoluga) ʼaē neʼe tupu ai te fetogi ʼo te aga ʼa Miguel (ʼi te faʼahi mataʼu)