ʼE Koutou Fia Maʼu Koa Hokotou ʼu Kaumeʼa Lelei?
TOKOLAHI ʼe nātou fia maʼu honatou ʼu kaumeʼa lelei. ʼE fiafia tokotou maʼuli mokā feala hakotou vaevae mo hokotou ʼu kaumeʼa lelei te ʼu ʼaluʼaga ʼaē neʼe hoko kiā koutou. Kae ʼe koutou lava maʼu feafeaʼi he ʼu kaumeʼa lelei? Kua hili kiai teitei taʼu e 2 000, neʼe fakahā e Sesu ko te faʼahi ʼaē ʼe maʼuhiga ke felogoi lelei te hahaʼi, ʼe ko tanatou fakahā te ʼofa ʼaē ʼe mole manatu pe kiā kita. Neʼe ina ʼui fēnei: “O hagepe ko te aga e koutou loto ke fai e te hahai kia koutou, pea ke koutou fai feia kia natou.” (Luka 6:31) ʼI te ʼu palalau ʼaia, ʼaē ʼe toe higoa ko te Lēkula ʼAulo, ʼe fakahā ai kapau ʼe koutou fia maʼu hokotou ʼu kaumeʼa pea ʼe mole tonu ke koutou manatu pe kiā koutou, kae ke koutou vaevae mo ʼihi. Ko tona fakahagatonu, ke feala hakotou maʼu hokotou ʼu kaumeʼa, ʼe tonu ke koutou aga fakakaumeʼa. ʼO feafeaʼi?
ʼE mole feala ke tupu fakavilivili he fakakaumeʼa lelei. ʼE mole feala ke koutou kaumeʼa mo he tahi mo kapau ʼe koutou feʼiloʼaki feiā pe. Kailoa, kae ko te ʼu kaumeʼa ʼe ko he ʼu hahaʼi ʼe koutou ʼoʼofa ai. ʼE tonu ke koutou faiga mālohi moʼo fakatuputupu pea mo taupau he ʼu felogoi lelei. ʼI te agamāhani, ko hakotou fakakaumeʼa mo he tahi ʼe fakamaʼua ke koutou fakamuʼamuʼa te ʼu meʼa ʼaē ʼe loto kiai ʼi te ʼu meʼa ʼaē ʼe koutou loto koutou kiai. Ko he ʼu kaumeʼa ʼe nā fevaevaeʼaki te ʼu faʼahi ʼaē ʼe nā fiafia ai pea mo te ʼu faʼahi ʼaē neʼe nā lotomamahi ai.
ʼE koutou liliu ko he kaumeʼa lelei mo kapau ʼe koutou fakafimālie pea mo tokoni ki he tahi ʼe ʼi te faigataʼaʼia. ʼE ʼui fēnei iā Tāʼaga Lea 17:17: “Ko he kaumeʼa moʼoni ʼe ʼofa ia ʼi te temi fuli pe, pea ʼe ko he tēhina neʼe tupu ki te ʼu ʼaho mamahi.” ʼI tona ʼuhiga moʼoni, ko he felogoi ʼa he ʼu kaumeʼa ʼe feala ke mālohi age ia ʼi te ʼu felogoi ʼi he loto famili. ʼE ʼui fēnei iā Tāʼaga Lea 18:24: “ ʼE ʼi ai te ʼu kaumeʼa ʼe faigafua hanatou femāveteʼaki, kae ʼe ʼi ai te kaumeʼa ʼe pipiki lahi age ia ʼi he tēhina.” ʼE koutou fia maʼu koa he tahi ʼu manatu moʼo ʼiloʼi peʼe feafeaʼi hakotou maʼu hokotou ʼu kaumeʼa? ʼE koutou fia fakatahi mo he ʼu hahaʼi ʼe ʼiloʼi nātou heʼe nātou feʼofa moʼoni ʼaki? (Soane 13:35) Kapau ʼe koutou loto kiai, pea ʼe fiafia anai te kau Fakamoʼoni ʼa Sehova ʼi takotou kolo hanatou fakahā atu peʼe feafeaʼi hakotou maʼu he ʼu kaumeʼa moʼoni.