Te Maʼuhiga ʼo “He ʼIpu ʼe Vaivai Age”
NEʼE tohi fēnei e te ʼapositolo ko Paulo: “ ʼU tagata ʼohoana, koutou haga nonofo [mo ʼokotou ʼu ʼohoana] ʼo mulimuli pe ki te ʼatamai mālama, ʼo faka maʼuhigaʼi nātou ohage ko he ipu ʼe vaivai age, te ipu fakafafine.” (1 Petelo 3:7, MN ) ʼE fakamālaloʼi koa ʼi te Tohi-Tapu ia te fafine, ʼi tana fakatātā ʼaē ki “he ipu ʼe vaivai age?” Tou vakaʼi age muʼa peʼe koteā te faka ʼuhiga ʼo te ʼu palalau ʼaia ʼa te tagata faitohi ko Paulo.
Ko te kupu faka Keleka ʼaē neʼe fakaliliu ʼaki te ʼu kupu “faka maʼuhigaʼi,” ʼe faka ʼuhiga ki “he totogi, ki he meʼa ʼe maʼuhiga . . . ki te fakaʼapaʼapa.” Koia, ʼe maʼua ki he tagata Kilisitiano kua ʼohoana, ke ina gaohi fakaleleiʼi tona ʼohoana, ke aga fakaʼapaʼapa ki ai, ohage ko hana gaohi fakaʼeteʼete ia he ipu ʼe maʼuhiga pea mo fakaʼisiʼisi gataʼa. Kae ʼe mole ko he fakamālaloʼi ʼaia ʼo nātou fafine. Ohage la ko te mālama hila lotus ʼo Tiffany. Ko te mālama hila ʼaia ʼe fakaʼisiʼisi gataʼa pea ʼe tonu ke tou gaohi fakaʼeteʼete. ʼE feala koa ke tou ʼui ʼe mole maʼuhiga heʼe fakaʼisiʼisi gataʼa? Kailoa! ʼI te taʼu 1997, neʼe fakatau te ʼuluaki mālama hila lotus ʼo Tiffany ki te falā 285 600 000! Koia, ʼuhi ko tona fakaʼisiʼisi gataʼa, neʼe mole meʼa noaʼi, kae neʼe totogi kovi ʼaupito tona fakatau.
ʼO toe feiā aipe, ʼe mole ko he fakamālaloʼi ʼo te fafine, ʼi te ʼui ʼaē ke faka maʼuhigaʼi ia ia ohage ko he ipu ʼe vaivai age. Ko te nofo mo tota ʼohoana “ ʼo mulimuli ki te ʼatamai mālama,” ko tona faka ʼuhiga, ko te tagata ʼohoana ʼe tonu ke ina ʼiloʼi ia te mālohi pea mo te ʼu tuʼakoi ʼo tona ʼohoana, te ʼu meʼa ʼaē ʼe ina leleiʼia, pea mo te ʼu meʼa ʼaē ʼe fehiʼa kiai, tana ʼu manatu pea mo te ʼu meʼa ʼaē ʼe ʼi tona loto. Ko he tagata ʼohoana ʼe mahino pea mo fakaʼapaʼapa ki te ʼu ʼaluʼaga ʼaē ʼe nā kehekehe ai mo tona ʼohoana. ʼE fakaʼapaʼapa ki ai ke ʼaua “naʼa ʼi ai he meʼa ʼe ina fakatuta [tana] ʼu faikole.” (1 Petelo 3:7, MN ) Ko he tagata ʼe mole fakaʼapaʼapa ki te ʼu agaaga ʼo tona ʼohoana, ʼe ina maumauʼi anai tanā ʼu felogoi mo te ʼAtua. Kua mahino lelei kiā tatou, ko te Folafola ʼa te ʼAtua ʼe mole ina fakalainoaʼi te hahaʼi fafine. Kailoa ia, kae ʼe ina fakaʼapaʼapaʼi pea mo ina faka maʼuhigaʼi nātou.
[Haʼuʼaga ʼo te paki pasina 32]
© Christie’s Images Limited 1997