“ ʼI Te Temi Nei, ʼe Au Tui ʼe ʼi Ai Te ʼAtua”
KO TE fafine mai Ukelenia ʼe higoa ko Alexandra, ʼe maʼuli ʼi Prague, ʼi te République Tchèque, neʼe toe liliu kiō ia ʼi tana ʼosi gāue. ʼI tana talitali ki te kā, neʼe ina tokagaʼi te kiʼi kato veliveli ʼi te ala neʼe feʼakaʼaki e te hahaʼi ʼaē neʼe fefakalakaʼaki. ʼI tana toʼo ake te kiʼi kato ʼaia pea mo ina vakaʼi ʼi loto, neʼe punamaʼuli ʼaupito ai. ʼI loto neʼe ʼi ai te foʼi falā! Neʼe mole he tahi neʼe hage neʼe ina kumi te kiʼi kato ʼaia. Mai tona ʼaluʼaga ʼaē ko Alexandra neʼe mole ko he tahi ʼo te fenua ʼo République Tchèque, neʼe faigataʼaʼia tona maʼuli. Koteā anai ka ina fai?
ʼI tana tau ki tona ʼapi, neʼe fakahā e Alexandra te kiʼi kato ki tana taʼahine, ʼaē ko Victoria. Neʼe nā huke ai te kiʼi kato ke nā maʼu he higoa pea mo he tuʼasila kae neʼe mole nā maʼu he meʼa. Kae neʼe ʼi ai te kiʼi moʼi pepa neʼe tohi ai te ʼu numelo. Neʼe tohi ʼi te moʼi pepa ʼaia te numelo ʼo te fale paʼaga pea ʼi te tahi faʼahi ʼo te pepa, neʼe ʼi ai mo te tahi ʼu numelo. Neʼe nā toe maʼu ai mo he ʼu fakatotonu neʼe tohi ki he fale paʼaga ʼo te kolo pea mo te pepa neʼe tohi ai te 1 300 000 tupu. Neʼe ko te lahi ʼaia ʼo te foʼi falā ʼaē neʼe ʼi te kato.
Neʼe mole he fua ʼo te ʼu faiga ʼa Alexandra ke telefoni ki te fale paʼaga, ʼi te numelo telefoni ʼaē neʼe tohi ʼi te kiʼi moʼi pepa. Pea neʼe ʼalu ai mo tana taʼahine ki te fale paʼaga pea nā fakamahino age te meʼa ʼaē neʼe hoko. Neʼe nā fehufehuʼi ʼo ʼuhiga mo te numelo ʼi te fale paʼaga ʼaē neʼe nā maʼu ʼi te kiʼi kato. Kae neʼe mole ʼiloʼi e te fale paʼaga ia te numelo ʼaia. ʼI te ʼaho ake, neʼe toe liliu ia Alexandra ki te fale paʼaga mo he tahi numelo neʼe ʼai ʼi te kiʼi kato. Pea neʼe ʼi ai te fafine ʼi te fale paʼaga neʼe ko tona numelo ʼaia. Neʼe telefoni ai ia Alexandra pea mo Victoria ki te fafine ʼaia, pea fakahā age e te fafine neʼe puli tana kiʼi kato. ʼI tanatou felāveʼi, neʼe fakamālo ʼaupito age te fafine kiā nāua pea ina fehuʼi fēnei age: “Koteā ʼaē ʼe feala ke au foaki atu ʼi takolua toe liufaki mai te foʼi falā?”
Neʼe tali fēnei e Victoria: “ ʼE mole mā loto ki he meʼa. Kanapaula neʼe mā loto ki he falā, kanaʼauala neʼe mā taupau pe te foʼi falā maʼa māua.” Neʼe faiga e Victoria ke ina fakamahino age ʼi te lea faka Tchèque, ʼo ina ʼui fēnei: “Neʼe mā toe liufaki atu te foʼi falā he ko māua ʼaenī ko te ʼu Fakamoʼoni ʼa Sehova. ʼUhi ko te akoʼi ʼo tomā ʼu leʼo ʼo loto ʼaki te Tohi-Tapu, neʼe mole feala ai ke mā taupau he meʼa neʼe mole ʼa māua.” (Hepeleo 13:18) ʼAki he loto fiafia, neʼe ʼui fēnei e te fafine: “ ʼI te temi nei, ʼe au tui ʼe ʼi ai te ʼAtua.”