ʼE Maʼuhiga Age ʼi Te ʼIloʼi ʼo Te Agaaga ʼo Te Lagi

ʼE TEITEI pē ki te ʼu fenua fuli, ʼe ʼi ai tanatou ʼu tāʼaga lea ʼo ʼuhiga mo te agaaga ʼo te lagi: Lagi kula ʼi te pōʼuli, fakafiafia ki te tautai, lagi kula ʼi te ʼuhu, ke tokaga te tautai. Iā ʼaho nei, ʼe fakahā e te hahaʼi ʼo te meteo te ʼu tupuʼaga ʼo tata sio ki te ʼu lanu ʼo te lagi ʼi te afiafi pea mo te ʼuhu, ohagē ko tona ʼui e te tāʼaga lea.

ʼI te temi ʼo Sesu, neʼe lagi māhani foki te hahaʼi ʼi te sivisivi ʼo te lagi pea mo fai te ʼu fakamolemole kiai. Neʼe ʼui fēnei e Sesu ki ʼihi Sutea: “Ka hifo te afiafi e koutou lau: ‘E laulelei, koteuhi e kula te lagi.’ Pea i te uhu: ‘I te aho-nei, e lâgi kovi koteuhi e kula fakapouli te lagi.’ E koutou poto i te lau o te fofoga o te lagi.” Kae neʼe toe hoko atu te palalau ʼa Sesu ʼo ina fai te ʼu palalau ʼe mole kita māhani kiai: “E mole koutou fealagia te lau o te u fakailoga o te u temi!”—Mateo 16:2, 3.

Neʼe koteā te “u fakailoga o te u temi” ʼaia? Ko te ʼu tuʼuga fakamahino ʼaē neʼe fai ʼo ʼuhiga mo Sesu neʼe ko te Mēsia moʼoni ʼaē neʼe fekauʼi mai e te ʼAtua. Ohagē pē ko te kula ʼo te lagi, neʼe ʼiloga lelei te faʼahi ʼaia ʼi tana ʼu gāue. Kae tokolahi ʼi te kau Sutea neʼe mole natou mahino ki te ʼu fakaʼiloga ʼaē kua hā lelei ai kua haʼu ia te Mēsia—ko he meʼa ia neʼe maʼuhiga age ʼi te ʼiloʼi ʼo te agaaga ʼo te lagi.

Iā ʼaho nei foki, ʼe ʼi ai te fakaʼiloga ʼe maʼuhiga age ʼi tata mahino ki te lanu ʼo te lagi. Neʼe fakakikite e Sesu kua vave pē te fakaʼauha ʼo te tuʼu agakovi ʼaenī, kae kamata fakatuʼu anai ia te mālama foʼou, ʼe lelei age. Neʼe lahi te ʼu fakaʼiloga neʼe ina foaki pea kapau ʼe fakatahiʼi, ʼe hā ai anai pe hoko ʼi te temi fea. ʼI te ʼu fakaʼiloga ʼaia, neʼe fakakikite te ʼu tau faka mālamanei pea mo te ʼu hoge. Neʼe ʼui e Sesu mokā hoko anai te ʼu fakaʼiloga ʼaia, pea kua ovi mai te fakaʼauha ʼo te mālamanei e te ʼAtua.—Mateo 24:3-21.

ʼE kotou sio koa ki “te u fakailoga o te u temi”?