Ko He ʼu Ako Maʼuhiga Maʼa Te Tamaliki

KO GLADYS ʼe gāue ʼi te faleako ʼi Mendoza, ʼi Alasatine. ʼI te tahi ʼaho, neʼe ʼalu ki te kalasi ʼo te faleako pea neʼe ina tokagaʼi ia te fafine faiako neʼe ina lau ki tana kau ako ia Te Tohi ʼo Te ʼu Hisitolia Faka Tohi-Tapu.a Neʼe fakahā e Gladys ki te fafine faiako ʼe ko ia ko te Fakamoʼoni ʼa Sehova, pea mo ʼui age ki ai ʼe ina lava fakahā age peʼe feafeaʼi hana faʼahiga fakaʼaogaʼi ʼo te tohi ke fua lelei. ʼI te leleiʼia e te fafine faiako ia te ʼu fakamahino ʼa Gladys, neʼe ina fia fakaʼaogaʼi ai te tohi ʼaia ki te ʼu tohi ʼaē ʼe ina faka ako ʼi te faleako. Kae neʼe tonu muʼa ke fakagafua age e te kau takitaki ʼo te faleako. Pea ko he meʼa fakafiafia kiā te ia, he neʼe tali ia tana kole.

Ki muli age, ʼi te polokalama moʼo fakaloto mālohiʼi te kau ako ki te lautohi, neʼe fakatotonu e te fafine faiako ki tana kau ako ke natou lau he kāpite ʼo te tohi ʼi muʼa ʼo tonatou ʼu kaugā ako. Neʼe fua lelei te polokalama ʼaia, he neʼe tupu ai ia te fakaafe ʼo te fafine faiako ke palalau ʼi te televisio. ʼI te temi ʼaē neʼe fakahā ai te aga ʼa te tamaliki ako, neʼe fehuʼi age e te tagata fai televisio ki te fafine faiako: “Koteā ʼaē ʼe ke fai ke tokaga lelei te tamaliki ki te ako?” Neʼe fakahā age e te fafine faiako, ʼe ina fakaʼaogaʼi Te Tohi ʼo Te ʼu Hisitolia Faka Tohi-Tapu. Neʼe ina fakamahino age, ʼe mole ina akoʼi te lotu ki tana kau kalasi, kae ʼaki te tohi ʼaia, ʼe ina akoʼi te ʼu aga ʼe tonu ke fai, ohagē lā ko te aga fakaʼapaʼapa, mo te fekātakiʼaki, mo te logo tahi, mo te gāue fakatahi, mo te fakalogo, pea mo te ʼofa. Neʼe natou fakamoʼoni fuli ko he ʼu ako maʼuhiga ʼaia maʼa te tamaliki.

ʼE kotou fia akoʼi koa ki ʼakotou fānau ia te ʼu aga ʼaia? ʼE feala hakotou kole age ki te kau Fakamoʼoni ʼa Sehova te tohi lelei ʼaia ʼaē ko Te Tohi ʼo Te ʼu Hisitolia Faka Tohi-Tapu.

[Kiʼi nota]