Te ʼu Fehuʼi ʼa Te Kau Lautohi

ʼE feafeaʼi koa hatatou mahino ki te ʼu mataʼi nūmelo ʼaē ʼe tuʼu ʼi te tānaki gāue ʼo te taʼu?

ʼI te taʼu fuli pē, ʼe tou fakatalitali ki te tānaki gāue ʼaē ʼe tā ʼi te Annuaire pea mo Te Minisitelio ʼo Te Puleʼaga ʼo te māhina ʼo Fepualio. ʼE tou fiafia ʼi tatatou sio ki te gāue ʼa te hahaʼi ʼa Sehova ʼi te mālamanei kātoa, ʼi te fakamafola ʼo te Puleʼaga ʼo te ʼAtua pea mo te akoʼi ʼo te hahaʼi. Kae hoki lahi age te ʼu lelei ʼaē ʼe tou maʼu mai te tānaki gāue, mo kapau ʼe tou mahino lelei ki te fakaʼuhiga ʼo te ʼu kupusiga palalau ʼaē ʼe tuʼu ʼi ʼoluga ʼo te tānakiʼaga, pea mo maʼu he manatu fakapotopoto ʼo ʼuhiga mo te ʼu mataʼi nūmelo. Tou vakaʼi age muʼa he ʼu faʼifaʼitaki.

Te taʼu gāue. ʼE kamata te taʼu gāue ʼi te māhina ʼo Sepetepeli ʼo he taʼu pea fakaʼosi ʼi ʼAukusitō ʼo te taʼu ʼaē ʼe hoa kiai. ʼE fakahā tuʼumaʼu pē ia te tānaki gāue ʼo te taʼu ʼaē kua hili. Koia ʼi Te Minisitelio ʼo Te Puleʼaga ʼo Fepualio 2011, ʼe maʼu ai te tānaki gāue ʼo te taʼu gāue 2010, ʼaē ʼe kamata mai te ʼaho 1 ʼo Sepetepeli 2009 ki te ʼaho 31 ʼo ʼAukusitō 2010.

Te laka foʼou ʼo te kau fai fakamafola pea mo te fakafuafua ʼo te kau fai fakamafola. ʼE kau ki “te kau fai fakamafola” ia te kau Fakamoʼoni ʼa Sehova ʼaē kua papitema, ʼo toe fēia pē mo nātou ʼaē ʼe mole heʼeki papitema kae kua fakagafua age ke natou fakamafola te Puleʼaga. Ko te mataʼi nūmelo ʼaē ʼe tuʼu ʼi “te laka foʼou ʼo te kau fai fakamafola,” ʼe mulimuli ki te māhina ʼo te taʼu gāue ʼaē neʼe kaugamālie ʼaupitō ai ia te kau fai fakamafola, pea ʼe lagi kau ai mo te ʼu pepa tānaki ʼo nātou ʼaē neʼe mole foaki ʼi te māhina ki muʼa atu. ʼE lagi lau tuʼa lua ai ʼihi kau fai fakamafola. Kae ko te mataʼi nūmelo ʼo te laka foʼou ʼaia ʼe ʼāteaina pē kiā nātou ʼaē neʼe natou ʼave tautonu tanatou pepa tānaki gāue, ʼo mole kau kiai nātou ʼaē neʼe foaki tauhala tanatou pepa tānaki gāue. ʼE fakahā ai ia te maʼuhiga ʼaē ki te kau fai fakamafola ke natou tahi foaki tautonu ia tanatou pepa tānaki ʼi te māhina fuli. Ko te mataʼi nūmelo ʼo ʼuhiga mo “te fakafuafua ʼo te kau fai fakamafola,” ʼe mulimuli pē ki te lahi ʼo te kau fai fakamafola ʼaē ʼi te agamāhani ʼe natou foaki tanatou pepa gāue ʼi te māhina fuli.

Te kātoa ʼo te ʼu hola. Ohagē ko tona tuʼu ʼi te tānaki gāue ʼaē neʼe tā ʼi te taʼu 2011, neʼe fakaʼaogaʼi e te kau Fakamoʼoni ʼa Sehova ia hola e tahi miliale onogeau miliona tupu ʼi te fai fakamafola. Kae ko te kātoa ʼo te ʼu hola ʼaia ʼe mole ko te ʼu hola fuli ʼaē neʼe tou fakaʼaogaʼi ki tatatou tauhi, heʼe mole kau kiai te temi ʼaē ʼe tou fakaʼaogaʼi tuʼumaʼu ki te ʼu gāue, ohagē lā ko te gāue fakatauhi ovi, te kau ki te ʼu fono, mo te temi ki te ako takitokotahi ʼo te Tohi-Tapu pea mo te metitāsio.

Te falā ʼaē neʼe fakaʼaogaʼi. ʼI te taʼu gāue 2010, ko te kau Fakamoʼoni ʼa Sehova neʼe natou fakaʼaogaʼi tola e teau nimagofulu-mā-nima miliona (ko te falā ʼo te Pasifika e 14 027 500 000) moʼo tokoni ki te gāue ʼa te kau pioniē makehe, te kau misionea pea mo te kau taupau feʼaluʼaki. Kae ko te mataʼi nūmelo ʼaia ʼe mole kau kiai ia te totogi ʼo te tā ʼo tatatou ʼu tohi Fakatohi-tapu, pea mo te falā ʼaē neʼe fakaʼaogaʼi moʼo tokoni ki te kau Petelite e toko ʼuafulu afe tupu ʼaē ʼe natou gāue ʼi te ʼu filiale ʼi te mālamanei kātoa.

Nātou ʼaē ʼe natou kai ki te pane pea mo ʼinu te vino ʼi te ʼAho Fakamanatu ʼo te mate ʼo Sesu. Ko te lahi ʼaia ʼa te kau Fakamoʼoni ʼaē kua papitema ʼaē ʼe natou kai ki te pane pea mo ʼinu te vino ʼi te mālamanei kātoa lolotoga te ʼAho Fakamanatu. ʼE ko te lahi koa ʼaia ʼo te kau fakanofo ʼaē ʼe kei māʼuʼuli ʼi te kele? Kailoa ia. ʼE lahi te ʼu ʼaluʼaga ʼe feala ai ke faihala ʼihi ʼo natou ʼui ʼe natou ʼolo ki selō, ohagē lā ko te ʼu akonaki ʼaē neʼe natou tui kiai ʼi te temi muʼa peʼe ko honatou mahaki ʼulu. Koia ʼe mole feala ai ke tou ʼiloʼi papau peʼe tokofia te kau fakanofo ʼaē ʼe kei māʼuʼuli ʼi te kele; pea ʼe ko he faʼahi ʼe mole ʼaoga ia ke tou ʼiloʼi. Koia ʼe mole taupau e te Kolesi Pule he lisi ʼo te ʼu higoa ʼo nātou fuli ʼaē ʼe natou kai ki te pane pea mo ʼinu te vino ʼi te ʼAho Fakamanatu.a

Ko te faʼahi ʼaē ʼe tou ʼiloʼi, ko ʼihi ʼo te ʼu “kaugana [fakanofo] ʼo totatou ʼAtua” ʼe māʼuʼuli anai ʼi te kele ʼi te temi ʼaē kā tuku ifo anai te ʼu matagi fakaʼauha ʼo te mamahi lahi. (Fakh. 7:1-3) ʼI te kei māʼuʼuli ʼa te kau fakanofo ʼi te kele, ʼe natou gāue kinakina ʼi te fai fakamafola pea mo te faiako. ʼE fakahā mai ʼi te tānaki gāue ʼo te taʼu, te ʼu gāue ʼaē ʼe fai e te hahaʼi ʼa Sehova ʼi te mālamanei kātoa ʼi te temi maʼuhiga ʼaenī ʼi te hisitolia ʼo te tagata.

[Nota]