Ko He Fono Moʼo Fakaloto Mālohiʼi ʼo Tatou ʼi Te Faʼahi Fakalaumālie
1 Neʼe ʼui fēnei e Paulo “ko te meʼa kai mālohi ʼe ʼa te kau tagata ʼaē kua matutuʼa, ʼa nātou ʼaē, ʼaki tanatou fai tuʼumaʼu, kua nātou maʼu te ʼatamai ʼe māhani ʼi te ʼiloʼi ʼo te lelei mo te kovi.” (Hep. 5:14) Ko te Ako Tohi ʼo te Kokelekasio ʼe ko he tahi ʼaia meʼa kai mālohi ʼe ʼaoga moʼo fakaloto mālohiʼi ʼo tatatou fakakaukau pea mo totatou loto. ʼE tou ako nei te tohi Fakahā. ʼE faigataʼa koa te tohi ʼaia ʼi ʼihi temi? ʼE feala ke liliu te ako tohi ko he meʼa lelei pea mo fakaloto mālohi, mokā ʼe tou teuteu fakalelei pea mo tou kau ki te ʼu fono. Ko te meʼa ʼe tupu mai ai, ko te fiafia lahi age, te fīmālie pea mo te tuputupu ʼi te faʼahi fakalaumālie. Ko tatatou kau ʼaē ki te ʼu fono ʼe ina toe fakaloto mālohiʼi ʼaupito ʼotatou ʼu tēhina.
2 Moʼo teuteuʼi ʼo te ako tohi, ko te famili takitokotahi ʼe lelei ke ina fai he ʼu fakatuʼutuʼu ʼo mulimuli ki te ʼu meʼa ʼe ʼaoga pea mo nātou mulimuli ki tonatou ʼu fealagia. Ko ʼihi famili, ʼe nātou teuteuʼi takitokotahi te ako. Ko ʼihi ʼe nātou teuteuʼi he ʼu kiʼi palakalafe ʼi te ʼaho fuli ʼi tanatou ʼolo pea mo tanatou liliu mai ʼaē mai tanatou gāue. Moʼo tokoni ki tanatou fānau, ʼe fakamanatuʼi age e te ʼu mātuʼa kia nātou te ako tohi pea mo fakaloto mālohiʼi ia nātou ke nātou teuteu ki te ako. Ko ʼihi famili ʼe nātou fakatokagaʼi ʼe lelei age tanatou toʼo he temi ke nātou teuteuʼi fakatahi ai te ako katoa.
3 Koia ko nātou fuli ʼaē ʼi te ako tohi, ʼe feala hanatou maʼu he ʼu tapuakina ʼe lahi age ʼi te ako tohi, mo kapau neʼe teuteu lelei te tēhina ʼaē ʼe ina taki. (1 Tim. 4:15, 16) ʼE tonu ke ina fakahā lelei peʼe feafeaʼi te ʼaoga ʼo te ʼu lea faka polofeta ʼaia kia tatou pea ke ʼaua naʼa pulinoa te temi ʼi he ʼu manatu ʼe mole ʼaoga. ʼI te hili ʼo te ako, ʼe feala ke ina toe vakaʼi te ʼu vaega mokā ʼe feala. Pea tahi ʼaē meʼa, ʼe tonu ke hinoʼi he tahi ʼe poto lelei ʼi te lautohi. ʼE tonu ke mahino lelei ki ai te alatike pea ke ina lau ʼo ina fakatokagaʼi te manatu ʼaē ʼe ʼaoga pea ke mātala lelei. ʼI te tokosiʼi ʼo te fono ʼaia, ʼe faka fealagia ki te tokolahi ke fai hanatou ʼu tali. ʼE lahi te temi moʼo kumi ʼo te ʼu vaega faka Tohi-Tapu, moʼo lau pea mo palalau kiai. Ko te ʼu hahaʼi ʼaē ʼe foʼofoʼou pea mo te fānau ʼe nātou fakatokagaʼi ʼe faigafua tanatou tali ʼi te ako tohi, pea ʼe vave tanatou tuputupu, ʼo feala ai tanatou fakahā ʼo tanatou tui. Koia, ʼe tonu ke ʼaua naʼa tou meʼa noaʼi te Ako Tohi ʼo te Kokelekasio, he ko te fono ʼaia moʼo fakaloto mālohiʼi ʼo tatou ʼi te faʼahi fakalaumālie.