Ko Te Selevisi Pionie — Ko He Fakahā ʼo Te ʼOfa
1 Kapau ʼe tou fakatuputupu tatatou kau ki te faka mafola, ko tona ʼuhiga ʼaē ʼe tou ʼofa kia Sehova pea mo ʼotatou ʼu kāiga. ʼI te tuputupu ʼo lahi totatou ʼofa kia Sehova pea mo te ʼu hahaʼi, ʼe tou holi ʼo faigaʼi ke lahi tatatou faka mafola. Ko totatou ʼofa ʼe tuputupu ʼi tatatou mahino lelei “ki te mālama totonu” ʼo te Folafola ʼa te ʼAtua (Filp. 1:9, 10). Ka lahi tatatou ʼiloʼi te finegalo ʼo Sehova, ʼe toe lahi ai foki te lave kia tatou te maʼuhiga ʼo totatou temi. ʼE ko te meʼa ʼaia ʼe fakamālohiʼi ai tatou ʼo ʼuhiga mo totatou kāiga. Tokolahi ʼe nātou fakahā tonatou ʼofa ʼo nātou toʼo te selevisi pionie.
2 ʼE feala koa hatatou fai he ʼu fetogi ʼaoga ʼi totatou maʼuli ke feala ai hatatou liliu ʼo pionie vaeluaʼi temi pe ʼe pionie katoa? ʼE moʼoni, ʼe mole feala foki ke tou pionie fulifuli. Kae ʼe tonu ke tou fakasiosio takitokotahi tona faʼahi ʼi te faikole.
3 Ko ʼihi kilisitiano ʼe nātou ʼui fēnei ʼe lahi tonatou temi ʼe nātou ʼāteaina ai pea ʼe feala ke nātou pionie; koia ʼe tonu ke nātou toe toʼo te temi faiga malie ʼo nātou toʼo ʼi te ʼu faʼahiga meʼa mole maʼuhiga ʼe puli ai tonatou temi (Ef. 5:15-17). ʼAki totatou ʼofa ki te ʼAtua pea mo totatou ʼu kāiga, ʼe tonu ke tou sakilifisioʼi niʼihi ʼotatou ʼu holi takitokotahi pea mo he faʼahi ʼo totatou koloā fakamālama moʼo fakahā lahi ai totatou ʼofa (Maleko 12:33). Ko te ʼu koloā fakamālama ʼe tou maʼu, pea ʼe lagi tou ʼui ʼe lelei tatatou maʼu te fahaʼi ʼaia, kae ʼi ʼihi fenua kia nātou ko te ʼu koloā ʼaia ʼe nātou faka maʼuhigaʼi.
4 Koteā te meʼa ʼe feala ke fai e te ʼu mātuʼa moʼo tokoniʼi ʼo tanatou ʼu fānau ke ia nātou te manatu ʼa te ʼAtua? Ko te ʼu mātuʼa ʼe tonu ke nātou faigaʼi ke ʼi ai he ʼu fakatuʼutuʼu faka teokalatike ʼa tanatou ʼu fānau mai tonatou kei veliveli. ʼI te ʼosi ʼo tanatou ako, ʼe ʼi ai koa hanatou ʼu fakatuʼutuʼu fakamālama pe ʼe fakalaumālie? ʼE tou loto ʼo tokoniʼi nātou ke nātou sisio ki te ʼu tapuakina tologa ʼaē ʼe maʼu e te kau tūpulaga ʼi tanatou toʼo te selevisi pionie. ʼE nātou tānaki ai he ʼu koloā ki selo (Mat. 6:19-21). Ko te filifili ʼaia ʼe leleiʼia e te ʼAtua pea ʼe hā ai tatatou agatonu pea mo tatatou pipiki maʼu kia te ia. Pea tahi foki ʼaē meʼa, ʼe ina haofaki te ʼu maʼuli.
5 ʼE loto te ʼAtua “ke haofaki te ʼu tagata kehekehe”. (1 Tim. 2:4.) ʼE feafeaʼi koa hatatou fakahā ʼe tou holi mo tatou ki te fahaʼi ʼaia? ʼE tou fakahā anai ʼo tuku ki muʼa te gāue ʼo te Puleʼaga. ʼE tou toe fakahā anai ʼaki tatatou ʼiloʼi papau ko Sehova ʼaē ʼe ina foaki mai te ʼu meʼa ʼe ʼaoga ki te maʼuli (Mat. 6:31-33). Ko te ʼu faʼahiga meʼa ekonomike ʼe lagi hoholo atu anai tona haʼele kovi, kae ʼe mole fetogi te fakapapau ʼaē ʼa Sehova ke tokaga lelei kia tatou. — Pes. 37:25.
6 ʼE tou fakahā totatou ʼofa ʼaki tatatou gāue ʼi te minisitelio, ʼo tou fai pe te meʼa ʼaē ʼe tou fealagia ki ai. Kia ʼihi, ko tona ʼuhiga kia nātou, ko te liliu ʼo pionie katoa. He koʼe koa mole kamata te gāue ʼaia ʼi te ʼaho 1 ʼo sepetepeli 1992?