Ko Te ʼu Tali Ki ʼAkotou ʼu Fehuʼi

◼ Koteā te teu ʼe mata feʼauga mokā tou papitema?

Logope te mole tatau ʼo te ʼu teu ʼi te ʼu potu kehekehe ʼo te malamanei, ko te tokoni faka tohi-tapu ʼaē ke teuteu “ ʼaki te aga fakapoipoi pea mo he aga poto” ʼe ʼaoga ki te kau kilisitiano fuli, logope la he potu ʼe nātou maʼuʼuli ai (1 Tim. 2:⁠9). ʼE tonu ke tou fakatokaga ki te fakatuʼutuʼu ʼaia ke tou fakasiosioʼi ai te teu ʼe mata feʼauga mokā tou papitema.

Ko Te Tule Leʼo ʼo te ʼaho 1 ʼo sūnio 1985, pasina 30, ʼe ina foaki mai te tokoni ki he tahi ʼe papitema: “ ʼE tonu ke kita aga fakapoipoi mokā kita fili he teu maʼanu ke fakaʼaogaʼi ʼi te faʼahi ʼaia. Ko te meʼa ʼaia ʼe maʼuhiga ʼaupito ʼi te temi nei ʼuhi ko nātou ʼaē ʼe nātou tui te ʼu mutuʼi meʼa ʼe nātou faiga ʼo uga te holi ki te felāveʼi fakasino pea ʼe teitei pe ke hā te telefua. Ko te tahi faʼahi ʼe tonu ke fakatokagaʼi ko ʼihi teu maʼanu ʼe hage ʼe mata fakapoipoi mokā ʼe moamoa kae ʼe mole tatau ia mo te temi leva ʼaē ʼe palapala ai. Ko he tahi ʼe papitema ʼe holi anai ke ʼaua naʼa ina fakahuahuaʼi te faʼahi ʼaia pea mo liliu ia ko he meʼa fakatupu tūkia lolotoga te toʼotoʼoga maʼuhiga ʼaē ko te papitema. — Filipe 1:10.”

ʼO ʼalutahi mo te tokoni ʼaia, ko nātou ʼaē ʼe papitema ʼe nātou teu fakapoipoi anai, ʼo fakahā ai tanatou faka maʼuhigaʼi te toʼotoʼoga ʼaia. Koia ko he teu maʼanu ʼe pipiki ki te sino mokā ʼe palapala ʼe ko he teu ia ʼe mole ʼaoga ki te kilisitiano pea ke ʼaua naʼa fakaʼaogaʼi te taʼi teu ʼaia. Pea, ʼe mole ʼaoga ki he tahi ke ina ʼai hona teu ʼe mole lelei peʼe ʼuli, peʼe ko te tui ʼo he ʼu kofu sino ʼe tuʼu ai he ʼu faʼahiga palalau peʼe ko te ʼu paki ʼo te mālama.

ʼI te vakaʼi e te ʼu tagata ʼāfea te ʼu fehuʼi mo nātou ʼaē ʼe fia papitema, ʼe lelei anai ke fakamahino age kia nātou ʼaia te maʼuhiga ʼo he teu ʼe mata feʼauga. ʼI te faʼahi ʼaia ko te aga fakaʼapaʼapa ki te toʼotoʼoga ʼaia ʼe tuʼumaʼu anai, pea ʼe hoko atu anai tatatou fakahā ʼe tou kehekehe mo te mālama. — Vakaʼi ia Soane 15:⁠19.