Tou Tokoni Kia Nātou Ke Nātou Fagono “ ʼI He Tahi Temi”
1 “ ʼE mātou fagono anai kia koe ʼi he tahi temi.” (Gāue 17:32) Ko te tali ʼaia ʼa ʼihi ki te akonaki ʼiloa ʼa Paulo ʼaē neʼe fai ʼi te Moʼuga ʼo Malesio. ʼO feiā aipe ʼi te temi nei, ko ʼihi ʼe nātou lotolelei ʼo fagono ki te logo ʼo te Puleʼaga ʼaē ʼe tou vaevae mo nātou ʼi tatatou ʼuluaki felogoi.
2 ʼE tou fai te koga ʼaoga ʼo tatatou fai akonaki ʼi tatatou fai te ʼu ʼaʼahi moʼo uga ʼo te fia logo. Ko te teuteu lelei ʼe tokoni anai kia tatou ke tou maʼu he ʼu fua ʼe lelei. ʼE ʼui fēnei e te tohi Manuel pour LʼEcole ʼi te pasina 49: “Koutou mahino muʼa ki te ʼu manatu ʼaē ʼe fakahā atu. Koutou faiga ke koutou mahino ki te tupuʼaga ʼo te faʼahi ʼaia. Koutou fakatokagaʼi peʼe feafeaʼi hakotou fakahā te ʼu manatu ʼi takotou faʼahiga palalau māhani. Koutou mahino lelei ki te ʼu fakamoʼoni faka Tohi-Tapu. Koutou teuteu ke koutou maʼuliʼi fakalelei te ʼu vaega faka Tohi-Tapu.”
3 Kapau neʼe koutou tuku te tohi “Mauli O Heegata,” ʼe feala hakotou ʼui age fēnei:
◼ “ ʼI tatā fai palalau fakamuli, neʼe tā talanoa ki te ʼu tupuʼaga ʼaē ʼe feala ai hatatou falala ki te Tohi-Tapu. ʼE ʼui mai e te Tohi-Tapu kua vave pe te fakatokatoka e te ʼAtua te ʼu faigataʼaʼia ʼi te temi nei, pea ʼe ina taki tatou ʼi te ala ʼaē ʼe feala ai ke tou maʼu te ʼu tapuakina ʼi te temi fiafia. [Lau ia Pesalemo 119:105.] Neʼe fai te tohi ʼaenī ko he tokoni ʼo ʼuhiga mo te ako takitokotahi pea mo te ako faka famili ʼo te Tohi-Tapu. ʼE ʼau fiafia anai ʼi te fakahā atu peʼe feafeaʼi tona fakaʼaogaʼi.”
4 ʼI takotou ʼaʼahi ia nātou ʼaē neʼe koutou tuku ki ai te kiʼi pepa lotu “Ko Te Malamanei ʼo Te Temi ʼAenī ʼe Hāo Anai Koa?” ʼe feala ke koutou ʼui age fēnei:
◼ “Ko tatou fuli ʼe tou fia ʼiloʼi te meʼa ʼaē ka hoko anai ʼi te temi ka haʼu. ʼUhi ko te ʼu meʼa ʼaē ʼe hoko ʼi te temi ʼaenī, ʼi tau manatu koteā anai koa te meʼa ka hoko? [Koutou faka fealagia ke fai atu hana tali.] Logope la ko te tagata ʼe feala ke ina fakahā tana manatu ʼo ʼuhiga mo te meʼa ʼaē ka hoko, ko te ʼAtua ʼe ina ʼiloʼi lelei te meʼa ʼaē ka hoko. [Lau ia Isaia 46:10.] E lagi ʼe koutou punamaʼuli ʼi takotou ʼiloʼi ʼaē ʼe fakakikite e te Tohi-Tapu kua vave pe tatatou maʼuli fiafia ʼi he mālama foʼou faka palatiso. Faka fealagia mai muʼa ke ʼau fakahā atu he ʼu manatu lahi ʼo ʼuhiga mo te fakapapau taulekaleka ʼaenī.”
5 Kapau neʼe koutou tuku ki he tahi te Tohi-Tapu “Traduction du monde nouveau,” e lagi ʼe lelei hakotou fakaʼaogaʼi te manatu ʼaenī:
◼ “Neʼe mole heʼeki faʼa fualoa, neʼe ʼau tuku atu te Tohi-Tapu, pea neʼe ʼau fakapapau atu ʼe ʼau toe liliu mai ʼo fakamahino atu peʼe feafeaʼi tona fakaʼaogaʼi fakalelei. ʼI he temi e lagi ʼe tou feʼuiʼaki peʼe lava feafeaʼi hatatou taupau maʼu ʼo te ʼofa ki niʼihi. ʼE foaki mai e te Tohi-Tapu te tokoni ʼaoga, pea ko te Tohi-Tapu Traduction du monde nouveau ʼe faigafua ai tatatou maʼu te meʼa ʼaē ʼe ʼaoga kia tatou. [Fakahā age te ʼu pasina 1543, 1544 pea koutou vakaʼi te kupu “ ʼOfa.” Koutou fakatokagaʼi ia ia ki te ʼu vaega ohage ko 1 Kolonito 13:4; Kolose 3:14; pea mo 1 Petelo 4:8. Koutou fakamahino fakanounou age ko te maʼuliʼi ʼo te ʼu pelesepeto ʼaia ʼe feala ke tou maʼu ai he ʼu fua ʼe lelei.] Ko te faʼifaʼitaki ʼaenī ʼe ina fakahā mai peʼe feafeaʼi te foaki mai e te Tohi-Tapu te ʼu puleʼaki ʼe ʼaoga ki ʼotatou ʼu faigataʼaʼia. ʼI he tahi ʼaho, ʼe ʼau fiafia anai ʼi te fakahā atu ʼo te tahi faʼahi ʼe fakahā mai e te Tohi-Tapu, ke feala ai hatatou maʼu te fiafia pea mo te tokalelei ʼi totatou ʼatamai.”
6 ʼE mole he tahi meʼa ʼe maʼuhiga age ʼe feala ke tou foaki ki niʼihi, ʼi te mālama totonu ʼaē ʼo ʼuhiga mo te Folafola ʼa te ʼAtua. Ko te taʼi mālama ʼaia ʼe feala ke ina ako ki te hahaʼi te manavasiʼi ʼaē kia Sehova, pea mo fakaloto mālohiʼi nātou ke nātou haʼele ʼi tona ala, ʼaē ʼe tou maʼu ai te ʼu tapuakina heʼegata.—Taag. 2:20, 21.