Ko Kilisito ʼe Ko He Faʼifaʼitakiʼaga Ki Te Kau Tūpulaga
1 ʼI te hili ʼo te fai palalau faka Tohi-Tapu loaloaga, neʼe ʼui fēnei e te tūpulaga: “Neʼe ʼau ōfo ʼi te ʼulugaaga mālohi ʼo Sesu Kilisito. Koʼena la te tagata takitaki ʼe feala ke ʼau falala ki ai.” ʼE mole feala ke tou ʼui feiā ʼo ʼuhiga mo te kau takitaki faka politike peʼe ko te hahaʼi ʼiloa ʼi te ʼu fai gaoʼi peʼe ko nātou ʼaē ʼe faka maʼuhigaʼi ʼi te tuʼu ʼaenī. Ko te kau Kilisitiano moʼoni ʼe mole nātou faʼifaʼitaki kia nātou ʼaē ʼe nātou muliʼi te ʼu lekula ʼo te mālama pea mo nātou maʼu he faʼahiga maʼuli ʼe fakafeagai ki te maʼuli faka Kilisitiano.—Pes. 146:3, 4.
2 ʼE feala ke ʼiloʼi papau e te kau tūpulaga kapau ʼe nātou haga tui kia Sesu Kilisito, ʼe nātou fakahā totonu ai ko nātou ko te ʼu ōvi ʼa te ʼAtua pea ʼe ʼiloʼi nātou e Sesu. ʼE tokaga lelei te tagata Tauhi ōvi agalelei kia nātou. (Soane 10:14, 15, 27) Ko te kau tūpulaga ʼaē ʼe mulimuli kia Kilisito ʼaē ko tonatou faʼifaʼitakiʼaga ʼe nātou maʼu ai te tapuakina.
3 Ko te tēhina ʼe gāue ʼi te temi nei ʼi te Petele ʼi Brooklyn, neʼe ina fai te fakatuʼutuʼu ʼo ʼuhiga mo te pilivilesio ʼaia talu mai tona taʼu valu. Neʼe fakaloto mālohiʼi ia ia ke ina faka ʼuhigaʼi te gāue ʼaē ʼi te Petele ohage ko he faʼahi ʼe ina fakahā ai tana muliʼi ʼaē ʼo te faʼifaʼitaki ʼa Kilisito ʼi te temi ʼaē ʼe lahi ai. Ko tana ʼu mātuʼa, ʼo feiā aipe ki te ʼu taupau feʼaluʼaki neʼe nātou fakaloto mālohiʼi ia ia ke ina taupau te fakatuʼutuʼu ʼaia. Moʼo tokoni ki ai, neʼe nātou fakaloto mālohiʼi ia ia ke maʼuli ohage ko he tahi ʼi te famili ʼo te Petele, ʼo ina fai te ʼu gāue ʼo te loto fale, ʼo tokoni ki te fakamaʼa ʼo te Fale ʼo te Puleʼaga, pea mo fakatuputupu tana faiva ʼi te minisitelio. ʼI te temi nei ʼaē ʼe gāue ai ʼi te Petele talu mai te ʼu taʼu fualoa, ʼe ina maʼu te loto fakafetaʼi ʼi tana faiga ʼaē talu mai tana kei veliveli ke ina muliʼi te faʼifaʼitaki ʼa Kilisito.
4 Neʼe mole mulimuli ia Sesu ki he gāue fakamālama; neʼe ina fili te minisitelio. Ko te tuagaʼane kei finemui neʼe fia pionie ʼi te ʼosi ʼo tana maʼu pepa ʼi te ako, kae neʼe lotolotolua ia, koteʼuhi neʼe mole ina maʼu he gāue vaeluaʼi temi ʼe feʼauga. Neʼe ina maʼu te manatu ʼaenī: ‘ ʼUluaki ʼe tonu muʼa ke ʼau maʼu haku gāue, ʼosi ʼaia pea hoki ʼau pionie leva.’ Neʼe ʼui age e te tagata ʼāfea kapau e loaloaga tana talitali, pea ʼe ina tali anai he gāue ʼi te ʼaho katoa, koteʼuhi ʼe mole he tahi age meʼa ʼe maʼumaʼua ki ai. Neʼe fēnei tana fakamatala: “Neʼe ʼau faikole kia Sehova ke ina taki ʼau ʼaki tona laumālie.” Neʼe ina foimo toʼo aipe te gāue pionie vaeluaʼi temi pea ki muli age neʼe liliu ia ʼo pionie katoa. Mole faʼa fualoa kiai, pea neʼe ina maʼu tana gāue ʼe ʼalutahi mo tana polokalama pionie.
5 Neʼe lototoʼa ia Sesu ʼo fakahā te logo ʼo te Puleʼaga ki te hahaʼi fuli. (Mat. 4:23) ʼE feala foki ke lototoʼa te kau Kilisitiano tūpulaga ʼi te fai faka mafola, ke ʼaua naʼa nātou matataku ki niʼihi. Neʼe ʼui fēnei e te tūpulaga Fakamoʼoni ʼe taʼu 14: “ ʼE ʼiloʼi fuli e te faleako ko ʼau ko te Kilisitiano. . . . ʼE nātou ʼiloʼi lelei te faʼahi ʼaia, koia mokā ʼe ʼau felāveʼi mo hoku kaugā ako ʼi te minisitelio, ʼe mole ʼau ufiufi. ʼI te agamāhani ʼe nātou fagono ki te moʼoni, pea e tuʼa lahi tanatou tali te ʼu tohi faka Tohi-Tapu.”
6 Ko te tokagaʼi ʼo te faʼifaʼitaki ʼa Kilisito ʼe feala ke tokoni ki te kau tūpulaga ke nātou fai he ʼu puleʼaki fakapotopoto ʼo ʼuhiga mo te temi ka haʼu. ʼO mole nātou maʼumaʼua ʼi te kumi ʼo te ʼu meʼa fakamālama, kae ʼe nātou ‘manatuʼi tonatou Tupuʼaga lahi’ ʼaki tanatou faiva ʼi te gāue ʼa Sehova. (Tnk. 12:1) Ohage ko Sesu Kilisito, ʼe nātou maʼu “te ʼofa ki te Tāmai,” ʼaē ʼe ina foaki mai te ʼu tapuakina ʼe lahi age tona lelei ʼi te meʼa ʼaē ʼe foaki mai e te mālama. ʼO mole nātou “mole” mo te mālama ʼāfea, kae ʼe nātou nonofo ‘ ʼo talu ai.’—1 Soane 2:15-17.