Te Tali Ki ʼAkotou ʼu Fehuʼi

◼ ʼE ko he meʼa lelei koa hatatou foaki he falā kia ia ʼaē ʼe tou feʼaluʼaki mo ia ʼi tana motokā?

Ko ʼihi ia tatou, ʼe nātou fakalogo ki te ʼu motokā ʼa ʼihi ke feala hanatou kau tuʼumaʼu ki te ʼu fono pea mo te gāue fai faka mafola. ʼE kaugamālie te ʼu tēhina mo te ʼu tuagaʼane ʼe nātou faiga fakamalotoloto pea mo fakaʼaogaʼi fakalelei tonatou temi, tanatou motokā mo te tahi ʼu meʼa moʼo feʼāveʼaki ʼo tatou. Logope la ʼe lagi tonu ke nātou teuteu fakatomuʼa pea ʼe nātou ʼolo tauhala ki tonatou ʼu ʼapi, ʼe nātou lotolelei ke nātou feʼāveʼaki tatou.

Ohage la ko te ʼu faʼahi fuli ʼo totatou minisitelio faka Kilisitiano, ʼe ʼaoga kiai te pelesepeto ʼaē ʼe tuʼu ia Kalate 6:5: “ ʼE tahi ʼamo anai tana ʼāmoga.” Koia, kapau ʼe tou ʼolo tuʼumaʼu ʼi te motokā ʼa he tahi, ʼe tonu ke tou fakahā tatatou fakafetaʼi ʼo mole gata ʼaki pe tatatou ʼu palalau, kae ʼe feala ke tou tokoni ki ai ʼo tou foaki age he falā moʼo totogi ʼo te ʼu meʼa ʼaē ʼe ʼaoga ki te motokā, mo kapau ʼe feala ke tou fai te faʼahi ʼaia.​—Mat. 7:​12; 1 Ko. 10:⁠24.

Tatau aipe peʼe ko ia ʼaē ʼaʼana te motokā, ʼe mole ina kole mai he falā pea ʼe hage ia ʼe mole ʼaoga kia ia, ʼe ko he meʼa lelei hakita foaki age he falā. ʼE lagi mole tali anai ʼe ia ʼaē ʼe ina taki te motokā; pea ʼe ʼa ia pe tona vakaʼi peʼe ina tali anai peʼe kailoa. Kae, ʼe lelei pe ke koutou foaki te meʼa ʼofa ʼaia. Kapau ʼe mole feala ke koutou foaki he meʼa ʼi te temi nei, ʼe feala ke koutou manatuʼi te potu ʼaia; ʼe lagi feala ke koutou foaki he meʼa ʼi te temi ʼaē ka koutou toe heka ai ʼi tana motokā.​—Luka 6:​38.

ʼE ko he lotoʼofa moʼoni ʼa te hahaʼi ʼaē ʼe nātou maʼu motokā, hanatou feʼāveʼaki niʼihi ke nātou ʼolo ki te ʼu fono pea mo kau ki te gāue faka minisitelio, mo kapau ʼe mole ʼi ai he tahi ʼe uli motokā ia nātou. (Taag. 3:​27) ʼO toe feiā pe foki, ʼe ko he lotoʼofa moʼoni ʼa te hahaʼi ʼaē ʼe fai kia nātou te agaʼofa ʼaia hanatou fakamālo ʼo nātou foaki he meʼa ʼofa ʼo mulimuli pe ki tonatou ʼu fealagia.​—Kol. 3:​15.