Te ʼu Tagata Taupau ʼe Ko He ʼu Faʼifaʼitaki—Te Tēhina ʼAē ʼe Ina Takitaki Te Tule Leʼo
1 Ko Te Tule Leʼo ʼe ina kalagaʼi te Puleʼaga ʼo Sehova ʼe ko te meʼa tāfito ʼaia ʼaē ʼe foaki mai e “te tagata kaugana agatonu mo poto” moʼo tufa te meʼa kai fakalaumālie kia tatou “ ʼi tona temi totonu.” (Mateo 24:45) ʼE ko he maʼua maʼuhiga ʼa te tagata ʼāfea ʼaē ʼe ina takitaki te Ako ʼo Te Tule Leʼo, heʼe tonu ke poto lelei ʼi te faiakonaki pea ke ina tuku he faʼifaʼitaki lelei ʼi tona maʼuli faka Kilisitiano.—Loma 12:7; Sake 3:1.
2 Ke lelei tana takitaki te ako ʼo Te Tule Leʼo, ʼe tonu ki te tagata ʼāfea ʼaia ke ina teuteuʼi fakalelei Te Tule Leʼo ʼi te vāhaʼa fuli. ʼE ina fai te faʼahi ʼaia ʼi te faikole pea mo tokaga fakalelei ki te faʼahi ʼaia. ʼE hā tana tuʼania ʼo ʼuhiga mo te kokelekasio ʼi tana faiga fakamalotoloto ʼaē ke malave ki totatou loto te alatike ʼaē ʼe ako. ʼE ina tokagaʼi fakalelei te ʼu manatu tāfito ʼo te alatike pea mo tokoni mai kia tatou ke tou fakapipiki te ʼu manatu ʼaia mo te kupu tāfito.
3 ʼI tana teuteu Te Tule Leʼo ʼe tonu ke ina vakaʼi fakatomuʼa te ʼu vaega, ke feala hana ʼiloʼi peʼe lava feafeaʼi hana fakaʼaogaʼi ki te kokelekasio. ʼE ina faka maʼuhigaʼi tuʼumaʼu te Folafola ʼa te ʼAtua, ʼo ina fakaloto mālohiʼi te kokelekasio ke nātou fakaʼaogaʼi lelei te Tohi-Tapu lolotoga te ako. Kapau neʼe mole maʼu ʼi te ʼu tali te puani tāfito peʼe kapau neʼe mole fakamahino he vaega maʼuhiga, pea ʼe ina fai he tahi fehuʼi ke fakahā ai te puani ʼaia. ʼI tana fai te faʼahi ʼaia, ʼe tokoni mai kia tatou ke tou mahino lelei ki te alatike pea ke tou ʼiloʼi peʼe feafeaʼi te maʼuliʼi ʼo te ʼu meʼa ʼaē ʼe tou ako.
4 Ko te tēhina ʼaē ʼe ina takitaki te ako ʼo Te Tule Leʼo ʼe ina faiga māmālie ke hikihiki tana faʼahiga fai ʼo te ako. ʼE mole tonu ke lahi fau tana palalau kae ʼe tonu ke ina fakaloto mālohiʼi tatou ke tou fai he ʼu tali—ʼaki tatatou ʼu palalau ʼa tatou totonu, ʼo tou fai he ʼu tali nounou, pea ʼe tou talanoa ki te puani tāfito. ʼI ʼihi temi, ʼe feala ke ina fakamanatuʼi mai ko te ʼuluaki tali ʼaē ʼe fai ʼe tonu ke nounou, pea ke tali fakahagatonu ki te fehuʼi. Ko te ʼu tali ʼaē ʼe hilifaki kiai ʼe lagi talanoa anai ki te faka ʼuhiga ʼo he vaega, ki he tahi ʼu manatu, peʼe ki te maʼuliʼi ʼo te puani ʼaia. ʼE uga e te tēhina ʼaē ʼe ina takitaki te ako ʼo Te Tule Leʼo ke fai he ʼu tali e te kokelekasio, ʼo ina fakaloto mālohiʼi nātou ke nātou teuteuʼi takitokotahi pea mo tanatou famili.
5 Mai tona ʼuhiga ʼaē ko tatou ko “he ʼu hahaʼi neʼe akoʼi e Sehova,” koia ʼe tou loto fakafetaʼi ai ki te ʼu “tagata ʼaia ʼaē ko he ʼu meʼa ʼofa,” ohage ko te ʼu tēhina ʼaē ʼe nātou takitaki te ako ʼo te Te Tule Leʼo, ʼuhi ko tanatou “gāue kinakina ʼi . . . te faiakonaki.”—Isaia 54:13; Efesi 4:8, 11; 1 Tim. 5:17.